— 88 —
يُخَادِعُونَ اللّٰهَ وَالَّذِينَ اٰمَنُوا وَمَايَخْدَعُونَ اِلَّا اَنْفُسَهُمْ وَمَا يَشْعُرُونَ ٭ فِى قُلُوبِهِمْ مَرَضٌ فَزَادَ هُمُ اللّٰهُ مَرَضًا وَلَهُمْ عَذَابٌ اَلِيمٌ بِمَا كَانُوا يَكْذِبُونَ
بو آيت بتون جملهلريله نفاقه هجوم ايدهرك، منافقلرى توبيخ، تقبيح، تهديد، تعجيب ايتمكله أوّلجه اٰمَنَّا ديدكلرى قَولى، نه مقصده و نه علّته بناءً سويلهدكلرينى و نفاقڭ أڭ برنجى جنايتى اولان، خداع و حيلهلرينى بيان ايتمكدهدر.
أوّلًا نفاقڭ برنجى جنايتى اولان خداعه عائد يُخَادِعُونَ دن يَكْذِبُونَ يه قدر يدى جملهيه ترتّب ايدن متسلسل نتيجهلرى نظره آلمق لازمدر.
١ - اللّٰهى قانديرمق گبى محال بر شيئڭ طلبنده بولوندقلرينه تحميق ايديلمشلردر.
٢ - منفعت نيّتيله كنديلرينه ضرر طوقونديرمق ايچون، تسفيه ايديلمشلردر.
٣ - منفعتى مضرّتدن تفريق ايدهمدكلرى ايچون، تجهيل ايديلمشلردر.
٤ - طينتلرى پيس، صحّتلرينڭ معدنى خسته، حيات منبعلرى ئولمش و سائره گبى رذالتلرينه ترذيل ايديلمشلردر.
٥ - شفانڭ طلبيله مرضلرينى تزييد ايتدكلرينه تذليل ايديلمشلردر.
٦ - ألمدن ماعدا بر شيئى إنتاج ايتمهين قويو بر عذاب ايله تهديد ايديلمشلردر.
٧ - إنسانلرجه علامتلرڭ أڭ چركينى اولان كذب ايله تشهير ايديلمشلردر.
صوڭره بو يدى جملهنڭ آراسندهكى إنتظام، إرتباطڭ شويله بر تصوير ايله ديڭلنمهسى لازمدر. بر شخص بر شخصى، نصيحتله فنا بر شيدن منع ايتمك اوزره شويله توجيهِ كلامده بولونور:
يا هذا! عقلڭ وارسه، شو ياپمق ايستديگڭ شى محالدر. هم نفسنه ضرردر. ايىيى كوتىيى تفريق ايدهجك بر حسّڭ يوق ميدر؟ آڭلاشيلان حقيقتى خرافه،
— 89 —
طاتلىيى آجى گوسترن سجيهڭده بر خستهلق واردر. طبيعى او خستهلقدن قورتولوب، شفاياب اولمق ايستهيورسڭ. فقط سنڭ بو حالڭ او خستهلغى إزاله دگل، تزييد ايدييور. أگر بو حالڭ ايله بر لذّت، بر ذوق ايسترسهڭ، أڭ شديد بر ألمى إنتاج ايدن بر عذاب ألڭه گچر. النهايه أگر سرخوشلغڭدن آييلوب، كوتو حالڭدن واز گچمديگڭ تقديرده، فسادڭ باشقهلره گچمهمك اوزره، خرطومڭ اوستنه بر دامغهنڭ وورولماسيله، سنى تشهير و إعلان ايتمك لازمدر.
كذالك جنابِ حق، منافقلرى نفاقدن زجر و منع ايچون، كوتو حاللرينى شويلهجه نقل ايتمكله يوزلرينه وورييور.
يُخَادِعُونَ اللّٰهَ يعنى، حيله ايله اللّٰهى قانديرمق ايستهيورلر. زيرا رسولِ أكرم اللّٰهڭ ألچيسيدر. اوڭا ياپيلان حيله اللّٰهه راجعدر. اللّٰهه ياپيلان حيله ايسه محالدر. محالى طلب ايتمك حماقتدر. بويله حيوانجهسنه حماقت، تعجّبى موجبدر.
وَمَايَخْدَعُونَ اِلَّا اَنْفُسَهُمْ
يعنى، اونلر آنجق نفسلرينه حيله ياپييورلر، زيرا فعللرنده نفع دگل ضرر واردر. بو ضرر ده نفسلرينه راجعدر. نفسلرينه ضرر ويرن، آنجق سفها طاقميدر.
وَمَا يَشْعُرُونَ يعنى، نفع و ضررى تفريق ايدهجك بر حسّه مالك دگللردر. بو ايسه جهالتڭ أڭ آلچاق و أڭ آشاغى بر دركهسنه دوشدكلرينه إشارتدر.
فِى قُلُوبِهِمْ مَرَضٌ يعنى، نفاق و حسددن قلبلرنده، روحلرنده اويله بر مرض واردر كه؛ حقّى باطل، حقيقتى خرافه تلقّى ايتمگه سببدر. ذاتًا فاسد بر قلبدن، بوزوق بر روحدن بويله رذالتلرڭ چيقماسى طبيعيدر.
فَزَادَهُمُ اللّٰهُ مَرَضًا يعنى، أگر اونلر ياپدقلرى فنالقله غيظ و حسدلرينى إزاله ايچون بر دوا، بر علاج طلبنده ايسهلر؛ او ظن ايتديكلرى علاج قلبلرينى، روحلرينى بوزان بر زهردر. زهر ايله تداويسنه چاليشان، ألبته ذليلدر. أوت قيريق و يارهلى بر أل ايله إنتقامنى آلمق ايستهين، يارهسنڭ آرتماسنه خدمت ايدن بر مسكيندر.
وَلَهُمْ عَذَابٌ اَلِيمٌ يعنى، أگر اونلر بر ذوق، بر لذّت طلبنده ايسهلر شو نفاقلرنده پك چوق معاصى اولديغى گبى، موقّت بر لذّت بيله يوقدر. آنجق دنياده شديد بر ألمى، آخرتده ده أڭ شديد بر عذابى إنتاج ايدهجك بر ضلالتدر.
— 90 —
بِمَا كَانُوا يَكْذِبُونَ يعنى، ياپدقلرى كذبدن پشيمان اولوب، ندامت ايتمدكلرى تقديرده، بين الناس يالانجيلقله تشهير و بر علامتله توسيملرى لازمدر كه، باشقهلر اونلره إعتماد ايدوب، مرضلرينه معروض قالماسينلر.
مذكور جملهلرڭ أجزالرى آراسنده بولنان إرتباط و إنتظامڭ بياننه گلهلم:
منافقلرڭ ياپدقلرى حيلهدن تعقيب ايديلن غايهنڭ محال اولديغنه و او محاليتى گوز ئوڭنه گتيروب، چركين بر شكلده گوستريلمسنه تصريح ايديلمك اوزره
يُخَادِعُونَ اللّٰهَ وَالَّذِينَ اٰمَنُوا
جملهسنده منافقلرڭ عملندن (مشاركت بابندن) مضارع صيغهسيله خداع عنوانيله تعبير ايديلمشدر.
و كذا مقامڭ إقتضاسى خلافنه النَّبِى يه بدل اللّٰه و المُؤْمِنِين يه بدل وَالَّذِينَ اٰمَنُوا ذكر ايديلمشدر. چونكه يُخَادِعُونَ نڭ مادّهسندن نفرت چيقار. صيغهسندن دوام و إستمرار چيقار. بابندن مشاركت چيقار. مشاركت ايسه، مشاكلتى، يعنى مقابلهِٔ بِالمثلى ايجاب ايدر. مشاكلت ايسه، اونلرڭ سيّئهلرينه قارشى سيّئه ايله مقابله ايديلهجگنى إستلزام ايدر. ديمك اونلرڭ دوام ايله ياپدقلرى شو كوتو فعل، نفسلرى تيترهتن بر نفرتى إنتاج ايتديگى گبى، تعقيب ايتدكلرى غرضڭ ده عقيم قالديغنه دلالت ايدر.
اللّٰه كلمهسنڭ تصريحندن ده، غرضلرينڭ محال اولديغنه دلالت واردر. چونكه رسولِ أكرمه ياپيلان خداع، اللّٰهه راجعدر. معلوم يا، اللّٰهله پنچهلشمك ايستهين دوشر.
وَالَّذِينَ اٰمَنُوا ، الَّذِينَ نڭ إبهامنى إزاله ايتمك ايچون صله اولارق ايمان صفتنڭ إختيار ايديلمسى اونلرڭ ايمان جهتيله كنديلرينى سَوْديرهرك مؤمنلردن عدّ ايتمك ايستهمش اولدقلرينه إشارتدر. و كذا نورِ ايمانله عقللرى منوّر اولان مؤمنلرڭ درايتندن، حيلهنڭ گيزلى قالمامسنه بر ايمادر.
وَمَا يَخْدَعُونَ اِلَّا اَنْفُسَهُمْ بو جملهدهكى حصر، كمالِ سفاهتلرينه إشارتدر. زيرا مؤمنلره ضرر ويرديرمك ايچون، ياپدقلرى معامله معكوسه اولوب، بالطهيى نفسلرينه وورمقله، صانكه او خداعى بِالذّات نفسلرينه ياپمقله سفاهتلرينى إعلان ايتمشلردر.
يَخْدَعُونَ نڭ يَضُرُّونَ يه ترجيحى، ينه سفاهتلرينه إشارتدر.
— 91 —
چونكه أصحابِ عقول آراسنده قصدًا نفسنه ضرر ويرن واردر. فقط عمدًا كنديسيله خدعه ياپان يوقدر. مگر كه، إنسان صورتنده بر أشك اوله...
اَنْفُسَهُمْ بو عنوان اونلره پك عزيز، سَوْگيلى اولان نفسلرينى ممنون ايتمك اوزره، بر حظِّ نفسانى قزانمق نيّتيله ياپدقلرى نفاق، عكس العمل قبيلندن بر زقّوم إثمار ايتمش اولديغنه إشارتدر.
س- بو جملهدهكى حصردن آڭلاشيلير كه، اونلرڭ خداع و نفاقلرى، إسلاميته و عالمِ إسلامه ضرر ويرمهمشدر. حالبوكه عالمِ إسلامڭ عنصرلرنده ئولديريجى زهر گبى إنتشار ايدن نفاق شُعْبهلرندن گورديگى ضررلرى، هيچ بر شيدن گورمهمشدر؟
ج- عالمِ إسلامده گورونن ضرر آنجق اونلرڭ بوزولمش طبيعتلرندن، تفسّخ ايتمش فطرتلرندن، تعفّن ايتمش وجدانلرندن نشئت و إنتشار ايتمشدر. يوقسه اونلرڭ آرزو و إختيار ايله ياپدقلرى خداع و حيلهلرڭ نتيجهسى دگلدر. چونكه اونلرڭ حيلهلرى جنابِ حقّه، پيغمبره، جماعتِ مسلمينه ياپيلان بر معاملهدر. معلومدر كه اللّٰه او معاملهيه عالمدر، پيغمبر ده وحى ايله واقفدر. جماعتِ مسلمينجه ده ايمانى بر شدّتِ ذكا سايهسنده او گبى حيلهلر تستّر ايدوب گيزلى قالاماز. ديمك اونلرڭ ووردقلرى بالطه، دونوب باشلرينى قيرمشدر. چونكه آلدانان جماعتِ مسلمين دگلدر. آنجق آلداتان آلداناندر.
وَمَايَشْعُرُونَ يعنى، ياپدقلرى حيلهنڭ نفسلرينه راجع اولديغنى حسّ ايتمييورلر. بو فذلكه اونلرڭ جهالتنى إعلان ايدييور. زيرا، عقلادن دگلدرلر. چونكه، اونلرڭ بو ايشلرى عقلا ايشى دگلدر. و كذا حيوان صنفنه ده بڭزهمييورلر. چونكه، حيوانلر ضررلى اولان شيلرى حسّ ايتدكلرندن چكينيرلر. ديمك بونلر، حسِّ حيوانيدن ده محرومدرلر. اويله ايسه، إختيار و شعورى اولميان جمادات نوعنه داخلدرلر.
فِى قُلُوبِهِمْ مَرَضٌ بو جملهنڭ ماقبليله وجهِ إرتباطى: وقتا كه، اونلر شعور حسّنى إستخدام ايدهرك محاكمهِٔ عقليه ايله عمل ايتمديلر. آڭلاشيلدى كه، روحلرنده بر مرض واردر. و لا أقل اونڭ ضررلى بر مرض اولديغنى بيلمهلرى لازمدر كه، او مرضدن صادر اولان حكملره إعتماد ايتمهسينلر. چونكه، او مرض حقيقتلرى تغيير ايتمك ايله آجىيى طاتلى، چركينى گوزل گوسترمك شانندهدر.
— 92 —
ظرفيتى إفاده ايدن فِى كلمهسندن آڭلاشيلير كه، اونلرڭ مرضلرى قلبڭ سطحنده دگلدر. آنجق قلبڭ ملكوتنده، يعنى ايچ يوزنده كائن بر مرضدر. قلب عنوانندن آڭلاشيلير كه، قلبڭ سطحنده بولنان بر خستهلق بتون أعمالِ بدنيهيى سكتهيه اوغراتديغى گبى، قلبڭ ايچ يوزى ده نفاق ايله خستهلانديغى زمان، أفعالِ روحيه تمامًا إستقامت اوزرينه لازم اولان حركتدن دوشرلر. چونكه حياتڭ محورى و ماكينهسى، آنجق قلبدر.
فِى قُلُوبِهِمْ ڭ مَرَضٌ اوزرينه تقديمى ايكى جهتله حصرى إفاده ايدر. برى: مرض باشقه عضولرده دگل، آنجق قلبلره منحصردر. ديگرى: او قلبلر ده آنجق منافقلرڭ قلبى اولوب، باشقهلرڭ قلبلرى دگلدر. او ايكى حصردن تعريض صورتيله آڭلاشيلير كه، نورِ ايمان، إنسانڭ بتون أفعال و آثارينه صحّت و إستقامتى ويرمك شانندهدر. و ينه آڭلاشيلير كه، فساد قلبدهدر. معلوم يا، بر شيئڭ أساسى، قلبى بوزوق اولورسه تفرّعاتنى تعمير ايتمك بر فائدهيى تشكيل ايتمز. و ينه آڭلاشيلير كه، فطرتدن حقيقت چيقار. و فطرت، حقيقتلره مرجع بر مصدردر. فساد و خراب ايسه، عارضى بر مرضدر. چونكه، أشياده أصل صحّتدر. مرض ايسه عارضيدر. بناءً عليه "نفاق و فساديمز فطريدر. إختيارى اولماديغندن موجبِ جزا دگلدر." دييه إعتذارده بولونامازلر.
تنكيرى، مجهوليتى إفاده ايدن تنوين ايسه؛ مرضڭ پك گيزلى اولديغندن نه گورونمسى و نه تداويسى ممكن اولماديغنه إشارتدر.
بشنجى جملهيى تشكيل ايدن
فَزَادَهُمُ اللّٰهُ مَرَضًا نڭ، ماقبليله وجهِ إرتباطى ايله أجزاسى آراسندهكى جهتِ إنتظام:
أوت، وقتا كه منافقلر ياپدقلرى عملدن بر مرض اولديغى قناعتيله إجتناب ايتمديلر. بِالعكس او عمللرينى إستحسان ايدهرك فضلهجه طلبنده بولنديلر. جنابِ حق ده طلبلرى اوزرينه آرتيردى.
س- فَزَادَ دهكى ف ماقبلنڭ مابعدينه سبب اولديغنى إفاده ايدر. حالبوكه بوراده مرضڭ وجودى، مرضڭ زيادهسنه سبب دگلدر؟
— 93 —
ج- وقتا كه اونلر، مرضلرينى تشخيص ايدوب تداويسى طلبنده بولونماديلر. صانكه إهماللك يوزندن زيادهسنى طلب ايتمشلردر. جنابِ حق ده مؤمنلرڭ ظفريله اونلرڭ اميدلرينى يأسه چويرمشدر. و مسلمانلرڭ غلبهسيله، اونلرڭ خصومتلرينى حسد و كينه قلب ايتمشدر. صوڭره ده، معروض قالدقلرى او يأس و كيندن طوغان قورقو، ضعفيت و ذلّت مرضلرينى قلبلرينه إستيلا ايتديرمكله مرضلرينى زيادهلشديردى.
س- قرآنِ كريمڭ بو جملهده مرض كلمهسنى مفعول دگل، تمييز شكلنده قوللانماسى نهيه إشارتدر؟
ج- منافقلرڭ باطنى و قلبى اولان مرضلرى، صانكه ظاهره چيقمش و بتون عمللرينه، فعللرينه سرايت ايتمكله، وجودلرى تماميله مرض كسيلمش اولديغنى إفاده ايتمك ايچون، مرض كلمهسى تمييز اولارق قوللانيلمشدر. أوت مرض كلمهسى مفعول اولديغى تقديرده، بو معنايى إفاده ايدهمز. چونكه او وقت زياده، يالڭز مرضه تعلّق ايدر.
آلتنجى جملهيى تشكيل ايدن وَلَهُمْ عَذَابٌ اَلِيمٌ ڭ وجهِ إرتباطى:
أوت منفعتى إفاده ايدن ل دن آڭلاشيلير كه، منافقلرڭ منفعتى يا دنياده أليم بر عذابدر ويا آخرتده شديد بر ألمدر. بونلر ايسه منفعت دگلدر. اويله ايسه منفعتلرى محالدر.
س- أليم، متألّم معناسنهدر. متألّم ايسه، شخصڭ صفتيدر. بناءً عليه عذابڭ، أليم له وصفلانديريلماسنده نه حكمت واردر؟
ج- عذاب اونلرڭ وجودلرينى اويله قاپلار و جسدلرينى اويله إحاطه ايدر و باطنلرينه اويله نفوذ ايدر كه، صانكه وجودلرى بر عذاب كولچهسى كسيلير. عذابدن ماعدا بر شى گورونمز. حتّى او عذاب كولچهسندن فيشقيران آهلر، فيزارلر، تألّملر صانكه نفسِ عذابدن نشئت ايدرلر. يعنى، چاغيران، باغيران، متألّم اولان، عينِ عذاب اولديغى صانيلير.
يدنجى جملهيى تشكيل ايدن بِمَا كَانُوا يَكْذِبُونَ نڭ، وجهِ إرتباطى:
أوت منافقلرڭ عذابلرى، مذكور جنايتلرى آراسنده يالڭز كذب ايله وصفلانديريلماسى، كذبڭ شدّتِ قبح و چركينلگنه إشارتدر. و بو إشارت دخى، كذبڭ نه قدر تأثيرلى بر زهر اولديغنه بر شاهدِ صادقدر.
— 94 —
زيرا، كذب كفرڭ أساسيدر. كذب، نفاقڭ برنجى علامتيدر. كذب، قدرتِ إلٰهيهيه بر إفترادر. كذب، حكمتِ ربّانيهيه ضددر. أخلاقِ عاليهيى تخريب ايدن كذبدر. عالمِ إسلامى زهرلنديرن آنجق كذبدر. عالمِ بشرڭ أحوالنى فساده ويرن كذبدر. نوعِ بشرى كمالاتدن گرى بيراقان كذبدر. مسيلمهِٔ كذّاب ايله أمثالنى عالمده رذيل و رسواى ايدن كذبدر. ايشته بو سببلردن طولاييدر كه، بتون جنايتلر ايچنده تلعينه، تهديده تخصيص ايديلن كذبدر. بو آيت إنسانلرى بِالخاصّه مسلمانلرى دقّته دعوت ايدر.
س- بر مصلحته بناءً كذبڭ جائز اولديغى سويلهنيلمكدهدر. اويله ميدر؟
ج- أوت، قطعى و ضرورى بر مصلحت ايچون مساغِ شرعى واردر. امّا حقيقته باقيليرسه، مصلحت ديدكلرى شى باطل بر عذردر. زيرا اصولِ شريعتده تقرّر ايتديگى وجهله، مضبوط و مقدارى معيّن اولميان بر شى، حكملره علّت و مدار اولاماز. چونكه مقدارى بر حدّ آلتنه آلينماديغندن سوءِ إستعماله اوغرار. مع هذا بر شيئڭ ضررى منفعتنه غلبه ايدرسه، او شى منسوخ و غيرِ معتبر اولور. مصلحت، او شيئى ترك ايتمكده اولور. أوت عالمده گورونن شو قدر إنقلابلر، قريشيقلقلر، ضررڭ عذر تلقّى ايديلن مصلحته غلبه ايتمسنه بر شاهددر. فقط كنايه ويا تعريض صورتيله يعنى غيرِ صريح بر كلمه ايله سويلهنيلن يالان، كذبدن صاييلماز.
خلاصه: يول ايكيدر: يا سكوتدر. چونكه سويلهنيلن هر سوزڭ طوغرى اولماسى لازمدر. ويا صدقدر. چونكه إسلاميتڭ أساسى، صدقدر. ايمانڭ خاصّهسى، صدقدر. بتون كمالاته ايصال ايديجى، صدقدر. أخلاقِ عاليهنڭ حياتى، صدقدر. ترقّياتڭ محورى صدقدر. عالمِ إسلامڭ نظامى، صدقدر. نوعِ بشرى كعبهِٔ كمالاته ايصال ايدن، صدقدر. أصحابِ كرامى بتون إنسانلره تفوّق ايتديرن صدقدر. محمّدِ هاشمىيى (عليه السلام) مراتبِ بشريهنڭ أڭ يوكسگنه چيقاران، صدقدر.
٭ ٭ ٭