— 64 —
اِنَّ الَّذِينَ كَفَرُوا سَوَاءٌ عَلَيْهِمْ ءَاَنْذَرْتَهُمْ اَمْ لَمْ تُنْذِرْهُمْ لَا يُؤْمِنُونَ
بو جملهنڭ ماقبليله جهتِ نظمى:
آرقداش! جنابِ حقّڭ صفاتِ أزليه عالمنده برى جلالى، ديگرى جمالى ايكى درلو تجلّيسى واردر. جلال ايله جمالڭ صفاتِ أفعال عالمنده تجلّيسندن؛ لطف و قهر، حُسن و هيبت تظاهر ايدر. أفعال عالمنه تجلّى ايدنجه؛ تحليه ايله تخليه (تزيين ايله تنزيه) طوغار. آثار و أعمال عالمندن عالمِ آخرته إنطباع ايدنجه؛ لطف، جنّت و نور اولارق؛ قهر ده، جهنّم و نار اولارق تجلّى ايدر. صوڭره عالمِ ذكره إنعكاس ايدنجه؛ برى حمد، ديگرى تسبيح اولمق اوزره ايكى قسمه آيريلير. صوڭره عالمِ كلامده تجلّى ايدنجه، كلامڭ أمر و نهيه تقسيمنه سبب اولور. صوڭره عالمِ إرشاده إنتقال ايدنجه؛ إرشادى ترغيب و ترهيب، تبشير و إنذاره تقسيم ايدر. صوڭره وجدانه تجلّى ايدنجه، رجا و خوف حصوله گلير. صوڭره إرشادڭ إقتضاسندندر كه، خوف ايله رجا آراسندهكى موازنه دوامله محافظه ايديلسين كه، رجا ايله طوغرى يوللره سلوك ايديلسين، خوف ايله ده أگرى يوللره گيديلمهسين. نه اللّٰهڭ رحمتندن مأيوس، نه ده عذابندن أمين اولونسون.
ايشته بويلهجه تسلسل ايدن شو حكمتدن طولايى قرآنِ كريم؛ على الدوام، ترغيبدن صوڭره ترهيب و أبرارى مدح ايتدكدن صوڭره فجّارى ذمّ ايتمشدر.
س- بو جمله ايله اِنَّ الْاَبْرَارَ لَفِى نَعِيمٍ وَاِنَّ الْفُجَّارَ لَفِى جَحِيمٍ جملهسى آراسنده نه گبى بر فرق واردر كه، اوراده عطف وار، بوراده يوقدر؟
ج- عطفڭ حسنى، مناسبتڭ حُسننه باقار. حسنِ مناسبت، هر ايكى جملهدن تعقيب ايديلن غرض و مقصدڭ بر اولماسنه متوقّفدر. حالبوكه اورادهكى مقصد، بوراده يوقدر. بوراده برنجى جملهدهكى مقصد، قرآنڭ مدحنه إنجرار ايدن مؤمنلرڭ مدحيدر.
— 65 —
ايكنجى جملهدن مقصد، يالڭز تخويف و ترهيب ايچون كافرلرڭ ذمّيدر. بو ايسه قرآنڭ مدحيله علاقهدار دگلدر.
صوڭره بو جملهنڭ إحتوا ايتديگى أجزانڭ نظمنده تظاهر ايدن لطائف جهتنه باقالم:
اِنَّ ايله اَلَّذِينَ موقعلره گوره إفاده ايتدكلرى نكتهلردن ماعدا، بلاغتجه قيمتلى صاييلان ايكى نكتهيى داها تضمّن ايتمشلردر كه؛ قرآن، پك چوق يرلرنده اِنَّ ايله اَلَّذِينَ يى مكرّرًا ذكر ايتمشدر. تحقيقى إفاده ايدن اِنَّ دهكى نكته شويله تصوير ايديلهبيلير كه: اِنَّ هر هانگى بر جملهده بولنورسه، او جملهنڭ طامنى دهلر، حقيقته نفوذ ايدر. و او دعوايى ويا حكمى آشاغىيه اينديرر، حقيقته ياپيشديرمقله، او حكمڭ خيالى ويا ظنّى ويا موضوع ويا خرافه حكملردن اولماديغنى و آنجق حقائقِ ثابتهدن اولديغنى إثبات ايدر. بو جملهده اِنَّ نڭ خصوصى نكتهسى: بو آيتڭ مخاطبى اولان حضرتِ محمّدده (عصم) شك و إنكار بولنمديغى حالده شك و إنكارى رفع ايتمك شأننده اولان اِنَّ ايله قارشيلانمهسى، اونلرڭ ايمان ايتمهسى ايچون پيغمبرڭ (عصم) شدّتِ حرصنه إشارتدر.
اَلَّذِينَ كلمهسى ايسه، گوزه گورونمزدن أوّل عقله گورونن غريب و يڭى حقيقتلره بر واسطهِٔ إشارتدر. بونڭ ايچوندر كه، حقيقتلرى تبديل و تجديد ايدن إنقلابلرى تصوير ايچون قوللانيلان إشارت و واسطهلردن أڭ چوق قوللانيلان، اَلَّذِينَ و أمثاليدر.
قرآنڭ تجلّيسيله چوق نوعلر سيليندى، حقيقتلر ييقيلدى. اونلره بدل، يڭى يڭى نوعلر، حقيقتلر تشكّل ايتدى. أوت زمانِ جاهليته باق! او زمانده بتون نوعلر ملّى رابطهلر اوزرينه تشكّل ايتديگى گبى، إجتماعى حقيقتلر ده تعصّبِ قَومى اوزرينه بنا ايديلمشدى. قرآنڭ تجلّيسيله او رابطهلر كسيلدى، او حقيقتلر تخريب ايديلدى. اونلره بدل، دينى رابطهلر اوزرينه يڭى نوعلر و حقيقتلر إحداث ايديلدى. أوت شمسِ قرآنڭ طلوعى ايله، بعض قلبلر اونڭ ضياسيله تنوّر ايتدى. و مؤمنلرڭ نوعنى تمييز و تعيين ايدن
— 66 —
بر حقيقتِ نورانيه ميدانه گلدى. كذالك او كسكين ضيا قارشيسنده، مزبلهيه بڭزهين بعض پيس قلبلر ده يانوب كومور اولديلر. و او كافرلرڭ نوعنى إعلان ايدن زهرلى بر حقيقتِ كفريه حصوله گلدى. ايشته بو حقيقتِ كفريهيه إشارت ايچون اَلَّذِينَ ذكر ايديلمشدر.
مع هذا هر ايكى اَلَّذِينَ آراسنده تام بر مناسبت واردر. چونكه هر بريسى بربرينه ضد اولان بر حقيقته إشارتدر.
و كذا حرفِ تعريف اولان ال ڭ إفاده ايتديگى بش معنايى، اَلَّذِينَ ده إفاده ايدييور. او معنالرڭ أڭ مشهورى، عهددر. يعنى گرك ال دن، گرك اَلَّذِينَ دن، معهود و معلوم بر شى قصد ايديلير. بناءً عليه أبو جهل، أبو لهب، اُميّه ابن خَلَف و سائره گبى معهود و مشهور بيوك كافرلره اَلَّذِينَ ايله إشارت ايديلمش اولديغى إحتمالى پك قويدر. بو إحتماله بناءً شو آيت، غيبدن إخبار ايدن آيتلردن برى اولور. چونكه اونلر كفر اوزرينه ئولمشلردر. و عين زمانده، إعجازِ معنوينڭ درت نوعندن بر نوعى، شو غيبى إخبارلردن تظاهر ايدر.
سؤال:قرآن ضرورياتِ دينيهدندر. ضرورياتده إختلاف اولاماز. حالبوكه مفسّرلرجه ويريلن آيرى آيرى معنالرڭ بر قسمى، بربرينه مخالفدر؟
جواب:عزيزم! قرآنڭ هر بر كلامى، اوچ قضيهيى مشتملدر:
برنجيسى: بو، اللّٰهڭ كلاميدر.
ايكنجيسى: اللّٰهجه مراد اولان معنا حقدر.
اوچنجيسى: معناىِ مراد، بودر.
أگر قرآنڭ او كلامى، باشقه بر معنايه إحتمالى اولميان محكماتدن اولورسه ويا قرآنڭ باشقه بر يرنده بيان ايديلمش ايسه، برنجى و ايكنجى قضيهلرى عينًا قبول ايتمك لازمدر و إنكارلرى ده كفردر. شايد قرآنڭ او كلامى، باشقه بر معنايه إحتمالى اولان بر نصّ ويا ظاهر اولورسه، اوچنجى قضيهيى قبول ايتمك لازم اولماديغى گبى إنكارى ده كفر دگلدر. ايشته مفسّرلرڭ إختلافلرى، آنجق و آنجق شو قسمه عائددر.