﴿وَ اُولٰئِكَ هُمُ الْمُفْلِحُونَ﴾ : بو جمله‌ده‌كى نكته‌لرڭ مأخذلرى:
١ - و ايله عطف. ٢- ﴿اُولٰئِكَ﴾ نڭ تكرارى. ٣- ضمير الفصل اولان هُمْ ٤- ال أداتى. ٥- فلاح يوللرينڭ عدمِ ذكريله ﴿مُفْلِحُونَ﴾ نڭ عام و مطلق بيراقيلماسى گبى بش مأخذدن عبارتدر.
برنجيسى: و ايله ياپيلان عطف، هر ايكى جمله آراسنده بولنان مناسبته بناءً ياپيلمشدر. زيرا برنجى ﴿اُولٰئِكَ﴾ سعادتِ عاجله اولان هدايت ثمره‌سنه إشارتدر. ايكنجى ﴿اُولٰئِكَ﴾ هدايتڭ ثمرهِٔ آجله‌سنه إشارتدر.
أوت هر بر ﴿اُولٰئِكَ﴾ ماقبلنه بر فذلكه، بر إجمالدر. فقط أركانِ إسلاميه مأخذ طوتولمقله، برنجى ﴿اُولٰئِكَ﴾ يى برنجى اَلَّذِينَ يه ربطى و ايكيسنڭ ده اُمّى مؤمنلره تخصيصى؛ و كذا أركانِ ايمانيه ايله يقين مأخذ طوتولمقله ايكنجى ﴿اُولٰئِكَ﴾ يى ايكنجى اَلَّذِينَ يه ربطى و ايكيسنڭ ده أهلِ كتاب مؤمنلره إرجاعى داها أولادر.
ايكنجيسى: ﴿اُولٰئِكَ﴾ نڭ تكرارى، هر ايكى سعادتڭ گرك هدايته، گرك اونلرڭ مدح و ثنالرينه مستقل و آيرى آيرى غايه‌لر و سببلر اولدقلرينه إشارتدر. فقط ايكنجى ﴿اُولٰئِكَ﴾ نڭ حكميله برابر، برنجى ﴿اُولٰئِكَ﴾ يه إشارتى داها أولادر.
اوچنجيسى: ضمير الفصل اولان هُمْ ، أهلِ كتابدن اولوب حضرتِ محمّد عليه الصلاة والسلامه ايمان ايتمه‌ينلره بر تعريض اولمق اوزره بو جمله ايله ياپيلان حصرى تأكيد ايتمك ايله برابر، گوزل بر نكته‌يى تضمّن ايتمشدر. شويله كه:
مبتدا ايله خبر آراسنده بولنان ﴿هُمْ﴾ ضميرى، مبتدايى چوق خبرلره مبتدا ياپار. و بو گبى خبرلرڭ تعييننى ده خياله حواله ايدر. يعنى خبرلرڭ محدود و معيّن اولماديغنى خياله عرض ايتمكله؛ خيالى، مناسب خبرلرى تحرّى ايتمگه تشويق ايدر. ناصلكه زيدى أله آلمقله "زيد عالمدر، زيد فاضلدر، زيد گوزلدر." گبى زيدڭ صفتلرندن چوق حكملرى ديزه‌بيليرسڭ. كذالك ﴿اُولٰئِكَ﴾ دن صوڭره گلن ﴿هُمْ﴾ ضميرى خيالى حركته گتيرمكله "اونلر آتشدن قورتولورلر." "اونلر جنّته گيررلر." "اونلر رؤيته مظهر اولورلر..." و داها بو گبى صفتلرينه مناسب چوق حكملرى و جمله‌لرى خياله ياپديرر.
دردنجيسى: ﴿اَلْمُفْلِحُونَ﴾ كلمه‌سنده‌كى ال ، حقيقتى تصويره إشارتدر. صانكه لسانِ حاليله دييور كه: "أگر مفلحلرڭ حقيقتنى گورمك ايسترسه‌ڭ، ﴿اُولٰئِكَ﴾ نڭ آيينه‌سنه باق، سڭا تمثّل ايده‌جكدر." ياخود اونلرڭ تعيين و تمييزلرينه إشارتدر. صانكه دييور: "أهلِ فلاح اولانلرى طانيمق ايسترسه‌ڭ، ﴿اُولٰئِكَ﴾ يه باق. ايچنده‌درلر." ويا حكمڭ ظاهر و بديهى اولديغنه إشارتدر.
بشنجيسى: فلاح و نجات يوللرينى تعيين ايتمه‌ين ﴿اَلْمُفْلِحُونَ﴾ كلمه‌سنده‌كى إطلاق، تعميم ايچوندر. شويله كه:
قرآنه مخاطب اولان، مطلوبلرى و ايستكلرى مختلف پك چوق طبقه‌لردر كه؛ بر قسمى، آتشدن نجات ايسته‌يورلر؛ بر قسمى، جنّته گيرمك ايسته‌يورلر؛ بر قسمى، رؤيته مظهر اولمق ايسته‌يورلر. و بونلر گبى او طبقه‌لرڭ پك چوق ديلكلرى واردر. قرآنِ كريم ﴿اَلْمُفْلِحُونَ﴾ كلمه‌سنى عام و مطلق بيراقمشدر كه، هركس ايستديگنى تعقيب ايتسين.
٭ ٭ ٭