— 47 —
وَالَّذِينَ يُؤْمِنُونَ بِمَا اُنْزِلَ اِلَيْكَ وَمَا اُنْزِلَ مِنْ قَبْلِكَ وَبِاْلٰاخِرَةِ هُمْ يُوقِنُونَ
قرآنِ كريم، بو آيت گبى چوق آيتلرده تركيبلرڭ، كلاملرڭ محتمل بولندقلرى إحتماللردن، وجهلردن بر إحتمالنى ويا بر وجهنى بر أماره ايله تعيين ايتمهمكله، نظمِ كلامى مرسل و مطلق بيراقمشدر. بو ده إعجازى إنتاج ايدن ايجازه منشأ اولارق لطيف بر سردر. شويله كه:
بلاغت، مقتضاىِ حاله مطابقتدن عبارتدر. قرآنڭ مخاطبلرى، مختلف عصرلرده متفاوت طبقهلردر. بو طبقهلره مراعاتًا، محاوره و مكالمهيى او عصرلره تشميل ايتمك اوزره، چوق يرلرده تعميم ايچون حذف ياپييور؛ چوق يرلرده نظمِ كلامى مطلق بيراقييور كه؛ أهلِ بلاغت و علومِ عربيهجه گوزل گورونن وجهلر، إحتماللر چوغالسين كه، هر عصرده هر طبقه، فهملرينه گوره حصّهسنى آلسين.
بو آيتى ماقبليله نظم و ربط ايدن مناسبت:
قرآنِ كريم، أوّلكى آيتله تعميم ياپديقدن صوڭره، بو آيتله تخصيص ياپمشدر. أوت بو آيت، أهلِ كتابدن ايمان ايدنلرى تخصيصله شرفلرينى إعلان و ايمانه گلمهينلرى ايمانه تشويق ايدييور. عبد اللّٰه ابن سلام أله آلينهرق ديگرلرينڭ عبد اللّٰه ابن سلام گبى اولمالرى ايچون ياپيلان تشويق گبى.
و كذا قرآنِ كريمڭ بتون امّتلره و رسالتِ محمّديهنڭ بتون ملّتلره شامل اولدقلرينى تصريح ايتمك اوزره، هر ايكى اَلَّذِينَ ايله مُتَّقِينَ نڭ هر ايكى قسمنه تنصيص ايديلمشدر.
و كذا يُؤْمِنُونَ بِالْغَيْبِ صدفنده بولنان ايمانڭ ركنلرينى بيان ايتمك ايچون، إجمالدن صوڭره تفصيله گچمشدر. چونكه بو آيت؛ كتابلره، قيامته صراحةً؛ رسل و ملائكهيه ضمنًا دلالت ايدر.
— 48 —
قرآنِ عظيم الشان بوراده وَالْمُؤْمِنُونَ بِالْقُرْاٰنِ گبى ايجازلى إفادهلرى ترك ايدوب، وَالَّذِينَ يُؤْمِنُونَ بِمَا اُنْزِلَ اِلَيْكَ ايله إطنابى إختيار ايتمشدر. شو إطناب، بو مقامى يوكسك نكته و لطائفله تزيين ايتمك ايچون إختيار ايديلمشدر.
١ - أسماءِ موصوله و مبهمهدن بولنان اَلَّذِينَ ، بوراده حكمڭ مدارى و مقصدڭ أساسى ايمان صفتى اولديغنه و موصوفى ايله سائر صفتلرى ايمان صفتنه تابع و آلتنده گورونمز بر دورومده اولدقلرينه إشارتدر.
٢ - يالڭز زمانلرڭ برنده ثبوتى إفاده ايدن مُؤْمِنُونَ كلمهسنه بدل فعل صيغهسيله يُؤْمِنُونَ تعبيرى، نزول و ظهور تكرّر ايتدكجه ايمانڭ تجدّد ايتديگنه إشارتدر.
٣ - إبهامى إفاده ايدن مَا ايمانِ إجمالينڭ كافى گلديگنه و ايمانڭ، حديث گبى باطنى و قرآن گبى ظاهرى وحيلره شامل اولديغنه إشارتدر.
٤ - اُنْزِلَ مادّهسى إعتباريله؛ قرآنه ايمان، قرآنڭ اللّٰهدن نزولنه ايمان ديمك اولديغنى گوسترييور. كذالك اللّٰهه ايمان؛ اللّٰهڭ وجودينه ايمان، آخرته ايمان، آخرتڭ گلمسنه ايمان ديمكدر.
٥ - اُنْزِلَ ، ماضىيه دلالت ايدن هيئتى إعتباريله، هنوز نازل اولميانڭ نزولى، نازل اولانڭ نزولى قدر محقّق اولديغنه إشارتدر. مع هذا يُؤْمِنُونَ دهكى إستقبال، اُنْزِلَ نڭ ماضيلگندن نشئت ايدن نقصانى تلافى ايدر. يعنى هنوز نازل اولميان قسم اُنْزِلَ نڭ شمولى داخلنده دگلسه ده، يُؤْمِنُونَ نڭ شمولى آلتندهدر. بو تنزيل مسئلهسى، قرآنڭ چوق يرلرنده وقوع بولمشدر. بعضًا ماضى، إستقباله مسافر گيدر. بعضًا ده مضارع، ماضينڭ مملكتنه گلير. بونده، چوق لطيف بر بلاغت واردر. شويله كه:
بر آدم، كنديسنه گوره هنوز گچمهمش بر شيئى ماضىيه دلالت ايدن بر صيغه ايله ايشيتديگى زمان، ذهنى هيجانه گلير، آييلير؛ آڭلار كه، مخاطب يالڭز او دگلدر. بلكه آرقهسنده مختلف مسافهلرده پك چوق آيرى آيرى طائفهلر، صفلر بولونمقله، كنديسنه توجيه ايديلن خطابلرى، ندالرى، إلٰهى خطابهلرى، آرقهسنده بولنان بتون او طائفهلر ايشيتير گبى ذهننه گلير.