— 44 —
قلب كمالِ شوق و إشتياقله إجابت ايتسين. و معراجوارى اولان او يوكسك مناجاته مظهر اولسون.
نماز، قلبلرده عظمتِ إلٰهيهيى تثبيت و إدامه و عقللرى اوڭا توجيه ايتديرمكله عدالتِ إلٰهيهنڭ قانوننه إطاعت و نظامِ ربّانىيه إمتثال ايتديرمك ايچون يگانه إلٰهى بر وسيلهدر. ذاتًا إنسان مدنى اولديغى جهتله، شخصى و إجتماعى حياتنى قورتارمق ايچون، او قانونِ إلٰهىيه محتاجدر. او وسيلهيه مراعات ايتمهين ويا تنبللكله نمازى ترك ايدن وياخود قيمتنى بيلمهين؛ نه قدر جاهل، نه درجه خاسر، نه قدر ضررلى اولديغنى بِالآخره آڭلار، أما ايش ايشدن گچر.
وَ مِمَّا رَزَقْنَاهُمْ يُنْفِقُونَ بو كلامڭ ماقبليله نظمنى ايجاب ايتديرن مناسبت ايسه: نماز عِمَادُ الدِّينِ يعنى دينڭ ديرگى و قوامى اولديغى گبى، زكات ده إسلامڭ قنطرهسى، يعنى كوپريسيدر. ديمك بريسى دينى، ديگرى آسايشى محافظه ايدن إلٰهى ايكى أساسدرلر. بونڭ ايچون بربريله باغلانمشلردر.
زكات ايله صدقهنڭ لايق اولدقلرى موقعلرينى بولمق ايچون بر قاچ شرط واردر:
١ - صدقهيى ويرمكده إسراف اولمامسى.
٢ - باشقهسندن آلوب باشقهسنه ويرمك صورتيله خلقڭ مالندن اولمايوب كندى مالندن اولماسى.
٣ - منّتله إنعامڭ بوزولمامسى.
٤ - فقير اولمق قورقوسيله صدقهنڭ ترك ايديلمهمسى.
٥ - صدقهنڭ يالڭز ماله و پارهيه منحصر اولماديغى بيلنمسيله علم، فكر، قوّت، عمل گبى شيلرده ده محتاج اولانلره صدقهنڭ ويريلمسى.
٦ - صدقهيى آلان آدم، او صدقهيى سفاهتده دگل، حاجاتِ ضروريهسنده صرف ايتمهسى لازمدر.
— 45 —
قرآنِ كريم بو شرطلرى، بو نكتهلرى إنسانلره صدقه اولارق إحسان و إحساس ايتمك ايچون يُزَكُّونَ ويا يَتَصَدَّقُونَ وياخود يُؤْتُونَ الزَّكٰوةَ گبى ايجازلى بر إفادهيى ترك ايدوب، وَ مِمَّا رَزَقْنَاهُمْ يُنْفِقُونَ گبى إطنابلى بر جملهيى إختيار ايتمشدر.
١ - تبعيضى إفاده ايدن مِنْ إسرافڭ ردّينه.
٢ - مِمَّا نڭ تقديمى، صدقهنڭ كندى مالندن اولديغنه.
٣ - رَزَقْنَا منّتڭ اولمامسنه. چونكه ويرن اللّٰهدر، قول ايسه بر واسطهدر.
٤ - رزقڭ نَا يه اولان إسنادى، فقيرلكدن قورقولمامسنه.
٥ - رزقڭ عام و مطلق اولارق ذكر ايديلمهسى، صدقهنڭ علم و فكر گبى شيلره ده شامل اولماسنه.
٦ - نفقه مادّهسى؛ آلانڭ، سفاهته دگل، حاجاتِ ضروريهسنه صرف ايتمسنه إشارتلردر.
بتون معاونت و يارديم نوعلرينى حاوى اولان زكات حقّنده صحيح اولارق رسولِ أكرم عليه الصلاة والسلامدن اَلزَّكٰوةُ قَنْطَرَةُ الْاِسْلَامِ حديثِ شريفى مرويدر. يعنى مسلمانلرڭ بربرينه يارديملرى، آنجق زكات كوپريسى اوزرندن گچمكله ياپيلير. زيرا يارديم واسطهسى، زكاتدر. إنسانلرڭ هيئتِ إجتماعيهسنده إنتظام و آسايشى تأمين ايدن كوپرى زكاتدر. عالمِ بشرده حياتِ إجتماعيهنڭ حياتى، معاونتدن طوغار. إنسانلرڭ ترقّياتنه أنگل اولان عصيانلردن، إختلاللردن، إختلافلردن ميدانه گلن فلاكتلرڭ ترياقى، علاجى معاونتدر.
أوت زكاتڭ وجوبى ايله ربانڭ حرمتنده بيوك بر حكمت، يوكسك بر مصلحت، گنيش بر رحمت واردر. أوت أگر تاريخى بر نظرله صحيفهِٔ عالمه باقهجق اولورسهڭ و او صحيفهيى لكهلنديرن بشرڭ مساويسنه، خطالرينه دقّت ايدرسهڭ، هيئتِ إجتماعيهده گورونن إختلاللر، فسادلر و بتون أخلاقِ رذيلهنڭ ايكى كلمهدن طوغديغنى گورورسڭ.
— 46 —
بريسى: "بن توق اولايم ده، باشقهسى آجلغندن ئولورسه ئولسون بڭا نه." ايكنجيسى: "سن زحمتلر ايچنده بوغول كه، بن نعمتلر و لذّتلر ايچنده راحت ايدهيم."
عالمِ إنسانيتى زلزلهلره معروض بيراقمقله ييقيلمغه ياقلاشديران برنجى كلمهيى سيلديرن آنجق زكاتدر.
نوعِ بشرى عمومى فلاكتلره سوروكلهين و بولشويكلگه سَوق ايدوب ترقّياتى، آسايشى محو ايدن ايكنجى كلمهيى كوكندن كسوب آتان، حرمتِ ربادر.
آرقداش! هيئتِ إجتماعيهنڭ حياتنى قورويان إنتظامڭ أڭ بيوك شرطى، إنسانلرڭ طبقهلرى آراسنده بوشلق قالمامسيدر. خواص قسمى عوامدن، زنگين قسمى فقرادن خطِّ مواصلهيى كسهجك درجهده اوزاقلاشماملرى لازمدر. بو طبقهلر آراسنده مواصلهيى تأمين ايدن، زكات و معاونتدر. حالبوكه وجوبِ زكات ايله حرمتِ ربايه مراعات ايتمدكلرندن، طبقهلر آراسى گيتدكجه گرگينلشير، خطِّ مواصله كسيلير، صلهِٔ رحم قالماز. بو يوزدندر كه، آشاغى طبقهدن يوقارى طبقهيه إحترام، إطاعت، محبّت يرينه إختلال صدالرى، حسد باغيرتيلرى، كين و نفرت واويلالرى يوكسلير. كذالك يوكسك طبقهدن آشاغى طبقهيه مرحمت، إحسان، تلطيف يرينه ظلم آتشلرى، تحكّملر، شمشك گبى تحقيرلر ياغييور. مع الأسف طبقهِٔ خواصدهكى مزيتلر، تواضع و ترحّمه سبب ايكن، تكبّر و غروره باعث اولويور. طبقهِٔ فقرادهكى عجز و فقيرلك، إحسان و مرحمتى موجب ايكن، أسارت و سفالتى إنتاج ايدييور. أگر بو سويلهدكلريمه بر شاهد ايسترسهڭ عالمِ مدنيته باق، ايستديگڭ قدر شاهدلر موجوددر.
خلاصه:طبقهلر آراسنده مصالحهنڭ تأمينى و مناسبتڭ تأسيسى، آنجق و آنجق أركانِ إسلاميهدن اولان زكات و زكاتڭ ياورولرى اولان صدقه و تبرّعاتڭ هيئتِ إجتماعيهجه يوكسك بر دستور إتّخاذ ايديلمسيله اولور.
٭ ٭ ٭