— 5 —
بِسْمِ اللّٰهِ الرَّحْمٰنِ الرَّحِيمِ
إعتذار
رسالهِٔ نور كلّياتندن "المثنوىّ العربى" ايله مُعَنْوَنْ بيوك استادڭ جهانبها پك قيمتدار شو أثرينى ده اللّٰهڭ عون و عنايتيله عربيدن توركجهيه چويرمگه موفّق اولمقله كنديمى بختيار عدّ ايدييورم. يالڭز، أصلندهكى علويت، قوّت و جزالتى ترجمهده محافظه ايدهمدم. أوت او جوهربها حقيقتلره ظرف اولاجق نه بر حرف و نه بر لفظ بولامدم. ترجمه لسانى ده، فكرم گبى ناقص و قاصر اولديغندن، او عظيم ايمانى و جسيم قرآنى حقيقتلره آنجق بويله طار و قيصه بر كسوهيى تدارك ايدهبيلدم. نه حقّڭ و نه حقيقتڭ خاطرى قالمش. فابريقهِٔ دماغيهمڭ بوزوقلغندن بو قدرينى ده مؤلّفِ محترم بديع الزمانڭ معنوى يارديملرى ايله طوقويهبيلدم.
أوت بر طاووق كندى اوچوشيله، شاهنڭ ويا قارتالڭ اوچوشلرينى تقليد و ترجمه ايدهمز. بو، حقيقةً أصلنه اويغون و لايق بر ترجمه دگلدر. (پك قيصه بر مئال، بعضًا ده طىّ ايديلمش، ترجمه ايدهمهمش.) چوق يرلرده يالڭز مئالنى آلدم. بعض يرلرده ده طىّ ايتدم. آنجق أصلندهكى حقائقى، أولادِ وطنه گوسترن كوچك بر آيينهدر...
رسالهٔ نور مؤلّفنڭ نسبًا كوچك قارداشى
و اون بش سنه اوندن درس آلان
عبد المجيد النورسى
— 7 —
رسالهٔ نورڭ بر نوع عربى مثنوئِ شريفى حكمنده اولان بو مجموعهنڭ مقدّمهسى "بش نقطه"در.
برنجى نقطه:قرق أللى سنه أوّل أسكى سعيد، زياده علومِ عقليه و فلسفيهده حركت ايتديگى ايچون، حقيقة الحقائقه قارشى أهلِ طريقت و أهلِ حقيقت گبى بر مسلك آرادى. أكثر أهلِ طريقت گبى يالڭز قلبًا حركته قناعت ايدهمدى. چونكه عقلى، فكرى حكمتِ فلسفيه ايله بر درجه يارهلى ايدى؛ تداوى لازمدى. صوڭره هم قلبًا، هم عقلًا حقيقته گيدن بعض بيوك أهلِ حقيقتڭ آرقهسنده گيتمك ايستدى. باقدى، اونلرڭ هر برينڭ آيرى جاذبهدار بر خاصّهسى وار. هانگيسنڭ آرقهسندن گيدهجگنه تحيّرده قالدى. إمامِ ربّانى ده اوڭا غيبى بر طرزده "توحيدِ قبله ايت!" ديمش؛ يعنى "يالڭز بر استادڭ آرقهسندن گيت!" او چوق يارهلى أسكى سعيدڭ قلبنه گلدى كه:
"استادِ حقيقى قرآندر. توحيدِ قبله بو استادله اولور." دييه، يالڭز او استادِ قدسينڭ إرشاديله هم قلبى، هم روحى غايت غريب بر طرزده سلوكه باشلاديلر. نفسِ أمّارهسى ده شكوك و شبهاتيله اونى معنوى و علمى مجاهدهيه مجبور ايتدى. گوزى قپالى اولارق دگل؛ بلكه إمامِ غزالى (رض)، مولانا جلال الدين (رض) و إمامِ ربّانى (رض) گبى قلب، روح، عقل گوزلرى آچيق اولارق، أهلِ إستغراقڭ عقل گوزينى قپاديغى يرلرده، او مقاملرده گوزى آچيق اولارق گزمش. جنابِ حقّه حدسز شكر اولسون كه، قرآنڭ درسيله، إرشاديله حقيقته بر يول بولمش، گيرمش. حتّى
وَ فِى كُلِّ شَيْءٍ لَهُ اٰيَةٌ تَدُلُّ عَلٰى اَنَّهُ وَاحِدٌ
حقيقتنه مظهر اولديغنى، يڭى سعيدڭ رسالهٔ نوريله گوسترمش.
— 8 —
ايكنجى نقطه:مولانا جلال الدين (رض) و إمامِ ربّانى (رض) و إمامِ غزالى (رض) گبى، عقل و قلب إتّفاقيله گيتديگى ايچون، هر شيدن أوّل قلب و روحڭ يارهلرينى تداوى و نفسڭ أوهامدن قورتولماسنى تأمينه چاليشوب، الحمد للّٰه أسكى سعيد يڭى سعيده إنقلاب ايتمش. أصلى فارسى صوڭره توركجه اولان مثنوئِ شريف گبى او ده عربجه بر نوع مثنوى حكمنده قطره، حباب، حبّه، زهره، ذرّه، شَمَّه، شعله، لمعهلر، رشحهلر، لاسيّمالر و سائر درسلرى و توركجهده او وقت نقطه و لمعاتى غايت قيصه بر صورتده يازمش؛ فرصت بولدقجه ده طبع ايتمش. ياريم عصره ياقين او مسلگى رسالهٔ نور صورتنده، فقط داخلى نفس و شيطانله مجادلهيه بدل، خارجده محتاج متحيّرلره و ضلالته گيدن أهلِ فلسفهيه قارشى رسالهٔ نور، گنيش و كلّى مثنويلر حكمنه گچدى.
اوچنجى نقطه:او يڭى سعيدڭ مناظرهسيله، نفس و شيطانڭ تام مغلوب ايديلمسى و صوصديريلماسى گبى، رسالهِٔ نور دخى يارهلانمش طالبِ حقيقتى قيصه بر زمانده تداوى ايتديگى گبى، أهلِ إلحاد و ضلالتى ده تام إلزام و إسكات ايدييور. ديمك بو عربى مثنوى مجموعهسى، رسالهِٔ نورڭ بر نوع چكردگى و فدانلغى حكمندهدر. بو مجموعهنڭ يالڭز داخلى نفس و شيطانله مجادلهسى، نفسِ أمّارهنڭ و شيطانِ جنّّى و إنسينڭ شبهاتندن تماميله قورتارييور. و او معلومات ايسه، مشهودات حكمنده و علم اليقين ايسه، عين اليقين درجهسنده بر إطمئنان و بر قناعت ويرييور.
دردنجى نقطه:أسكى سعيد علمِ حكمت و علمِ حقيقتڭ چوق درين مسئلهلريله مشغول اولماسى و بيوك علمالرله درين مسئلهلر اوزرنده مناظرهسى و مدرسهنڭ يوكسك درسلرينى گورن أسكى طلبهلرينڭ فهملرينڭ درجهسنه گوره يازماسى و أسكى سعيدڭ ده ترقّياتِ فكريه و قلبيهسنده، يالڭز كنديسى آڭلايهجق بر صورتده، غايت قيصه جملهلرله و غايت مختصر بر إفاده ايله اوزون حقيقتلره قيصه كلمهلرله إشارتلر نوعنده او مجموعهيى يازديغى ايچون، بر قسمنى أڭ مدقّق عالملر ده زورله آڭلايهبيلير. أگر تام ايضاح اولسه ايدى، رسالهِٔ نورڭ مهمّ بر وظيفهسنى گورهجكدى. ديمك او فدانلق مثنوى، طُرُقِ خفيه گبى أنفسى و داخلى جهتنده چاليشمش؛ قلب و روح ايچنده يول آچمغه موفّق اولمش. باغچهسى اولان رسالهِٔ نور، هم أنفسى، هم أكثرى جهتنده طُرُقِ جهريه گبى آفاقى و خارجى دائرهيه باقوب معرفت اللّٰهه گنيش و هر يرده يول آچمش. عادتا موسى عليه السلامڭ عصاسى گبى نرهيه وورمش ايسه صو چيقارمش...
— 9 —
هم رسالهِٔ نور، حكما و علمانڭ مسلگنده گيتمهيوب، قرآنڭ بر إعجازِ معنويسيله، هر شيده بر پنجرهِٔ معرفت آچمش؛ بر سنهلك ايشى بر ساعتده گورور گبى قرآنه مخصوص بر سرّى آڭلامشدر كه، بو دهشتلى زمانده حدسز أهلِ عنادڭ هجوملرينه قارشى مغلوب اولمايوب غلبه ايتمش.
بشنجى نقطه:أسكى سعيدڭ يڭى سعيده إنقلاب ايتمهسى زماننده، يوزر علملرله علاقهدار بيڭلر حقيقتلر، آيرى آيرى برر رسالهيه موضوع اولاجق قيمتده ايكن، او سعيد تأليف ايدركن، مسئلهلرڭ باشنده "إعلم، إعلم، إعلم"لرله، هر بر حقيقتى (كه، بر رساله اولاجق درجهده أهمّيتلى ايكن) بر قاچ سطرده، بعضًا بر صحيفهده، بعضًا بر ايكى سطرده ذكر ايدييورلر. عادتا هر بر "إعلم"، بر رسالهنڭ شفرهسيدر.
هم "إعلم"لر، بربرينه باقميهرق مختلف علملرڭ و حقيقتلرڭ فهرستهلرى حكمنده يازيلديغندن، او مجموعهيى اوقويانلر، بو نقطهلرى نظره آلوب إعتراض ايتمهسينلر.
سعيد النورسى
٭ ٭ ٭