بِاسْمِهِ ٭ وَاِنْ مِنْ شَيْءٍ اِلَّا يُسَبِّحُ بِحَمْدِهِ

مقدّمه

خلوصى بك و صبرى أفندينڭ مكتوبلرنده رسالهٔ‌ِ نور حقّنده‌كى فقره‌لرينڭ، بر مكتوب صورتنده رسالهٔ‌ِ نور أجزالرى ايچنده إدخال ايديلمه‌سنڭ بش سببى وار:

برنجيسى:

خلوصى ايسه، آخرده‌كى سوزلرڭ و أكثر مكتوباتڭ يازيلماسنه اونڭ غيرتى و جدّيتى أڭ مهمّ سبب اولماسى... و صبرينڭ دخى اون طوقوزنجى مكتوب گبى بر ثُلثِ مكتوباتڭ يازيلماسنه سبب، اونڭ صميمى و جدّى إشتياقى اولماسيدر.

ايكنجى سبب:

بو ايكى ذات بيلمييورلردى كه؛ بر وقت شو فقره‌لر نشر ايديله‌جك. بيلمدكلرى ايچون غايت صميمى، تصنّعسز، خالصانه و درجهٔ‌ِ ذوقلرينى و او حقائقه قارشى شوقلرينى إفاده ايتمك ايچون، خصوصى بر صورتده يازمشلر. اونڭ ايچون او تقديراتلرى تقريض نوعندن دگل، طوغريدن طوغرى‌يه مبالغه‌سز بر صورتده، گوردكلرى و ذوق ايتدكلرى حقيقتى إفاده ايتمه‌لريدر.

اوچنجى سبب:

بو ايكى ذات حقيقى طلبه‌لرمدن و جدّى آرقداشلرمدن... و خدمتِ قرآنده آرقداشلرم ايچنده طلبه‌لك و قارداشلق و آرقداشلغڭ اوچ خاصّه‌سى وار كه، بو ايكى ذات اوچنده ده برنجيلگى قزانمشلر.

برنجى خاصّه:بڭا منسوب هر شيئه ماللرى گبى تصاحب ايدييورلر. بر سوز يازيلسه، كنديلرى يازمش و تأليف ايتمش گبى ذوق آلييورلر، اللّٰهه شكر ايدييورلر. عادتا جسدلرى مختلف، روحلرى بر حكمنده حقيقى معنوى ورثه‌لردر.

ايكنجى خاصّه:بتون مقاصدِ حياتيه ايچنده أڭ بيوك، أڭ مهمّ مقصدلرى، او نورلى سوزلر واسطه‌سيله قرآنه خدمت بيلييورلر. دنيا حياتنڭ نتيجهٔ‌ِ حقيقيه‌سنڭ و دنيايه گلمكده‌كى وظيفهٔ‌ِ فطريه‌لرينڭ أڭ مهمّى، حقائقِ ايمانيه‌يه خدمت اولديغنى تلقّيلريدر.

اوچنجى خاصّه:بن كندى نفسمده تجربه ايتديگم و أجزاخانهٔ‌ِ مقدّسهٔ‌ِ قرآنيه‌دن آلديغم علاجلرى، اونلر ده كندى ياره‌لرينى حسّ ايدوب او علاجلرى مرهم صورتنده تجربه ايدييورلر. عين حسّياتمله متحسّس اولويورلر. و أهلِ ايمانڭ ايمانلرينى محافظه ايتمك غيرتى، أڭ يوكسك درجه‌ده طاشيمالرى و أهلِ ايمانڭ قلبنه گلن شبهات و أوهامدن حاصل اولان ياره‌لرى تداوى ايتمك إشتياقى، يوكسك بر درجهٔ‌ِ شفقتده حسّ ايتمه‌لريدر.

دردنجى سبب:

خلوصى بك بنم يگانه معنوى أولادم و مدارِ تسلّيم و حقيقى وارثم و بر دهاىِ نورانى صاحبى اولاجغى محتمل اولان برادرزاده‌م عبد الرحمانڭ وفاتندن صوڭره، خلوصى عينًا يرينه گچوب او مرحومدن بكله‌ديگم خدمتى، اونڭ گبى ايفايه باشلاماسيله.. و بن اونى گورمه‌دن أپى زمان أوّل سوزلرى يازاركن، اونڭ عين وظيفه‌سيله موظّف بر شخصِ معنوى بڭا مخاطب اولمشجه‌سنه، أكثريتِ مطلقه ايله تمثيلاتم اونڭ وظيفه‌سنه و مسلگنه گوره اولمشدر. ديمك اولويور كه، بو شخصى جنابِ حق بڭا خدمتِ قرآن و ايمانده بر طلبه، بر معين تعيين ايتمش. بن ده بيلميه‌رك اونڭله اونى گورمه‌دن أوّل قونوشويورمشم، درس ويرييورمشم.

صبرى ايسه فطرةً بنده موجود خاص بر نشان وار. بتون گزديگم يرده كيمسه‌ده گورمدم. صبرى‌ده عين نشانِ فطرى وار. بتون طلبه‌لرم ايچنده، قرابتِ نسليه‌دن داها زياده بر قرابت كندنده حسّ ايتمش. و شو حواليده أڭ آز اُميد ايتديگم و او ده گج اويانديغى حالده أڭ ايلرى گيتديگى بر إشارتدر كه؛ او ده بر خلوصئِ ثانيدر، منتخبدر. جنابِ حق طرفندن بڭا طلبه و خدمتِ قرآنده آرقداش تعيين ايديلمشدر.

بشنجى سبب:

بن كندى شخصمه عائد تقديرات و مدحى قبول ايتمه‌م. چونكه

معنًا بيوك ضرر گوردم. اونڭ ايچون شخصمه قارشى تقديرات، فخر و غروره مدار اولديغى ايچون شدّتله نفرت ايدوب قورقويورم. فقط قرآنِ حكيمڭ دلّالى و خدمتكارى اولمقلغم جهتندن و او وظيفهٔ‌ِ قدسيه نقطه‌سنده تقديرات و مدح بڭا عائد اولمايوب، نورلى سوزلره و بلكه طوغريدن طوغرى‌يه حقائقِ ايمانيه‌يه و أسرارِ قرآنيه‌يه عائد اولديغى ايچون اونى مفتخرانه دگل، جنابِ حقّه قارشى متشكّرانه قبول ايدييورم. ايشته بو ايكى شخص، بو حقيقتى هركسدن زياده آڭلادقلرى ايچون، اونلر بيلميه‌رك وجدانلرينڭ سَوقيله يازدقلرى تقديرات و مدحلرينى، رسالهٔ‌ِ نور أجزالرى ايچنده درج ايديلمگه سبب اولمشدر. جنابِ حق بونلرڭ أمثالنى زياده ايتسين و اونلرى ده موفّق ايتسين و طريقِ حقدن آييرماسين، آمين.

اَللّٰهُمَّ وَفِّقْنَا وَ اِيَّاهُمَا وَ اَمْثَالَهُمَا مِنْ اِخْوَانِنَا لِخِدْمَةِ الْقُرْاٰنِ وَ الْاِيمَانِ كَمَا تُحِبُّ وَ تَرْضٰى بِحَقِّ مَنْ اَنْزَلْتَ عَلَيْهِ الْقُرْاٰنَ عَلَيْهِ اَفْضَلُ الصَّلَاةِ وَ اَتَمُّ التَّسْلِيمَاتِ مَا اخْتَلَفَ الْمَلَوَانِ وَ مَا دَارَ الْقَمَرَانِ

سعيد النورسى