— 166 —
اون ايكنجى لمعه
(رأفت بگڭ ايكى جزئى سؤالى مناسبتيله، ايكى نكتهِٔ قرآنيهنڭ بياننه دائردر.)
بِاسْمِهِ سُبْحَانَهُ ٭ وَاِنْ مِنْ شَيْءٍ اِلَّا يُسَبِّحُ بِحَمْدِهِ
اَلسَّلَامُ عَلَيْكُمْ وَ عَلٰى اِخْوَانِكُمْ وَ رَحْمَةُ اللّٰهِ وَ بَرَكَاتُهُ
عزيز صدّيق قارداشم رأفت بك! سنڭ بو مساعدهسز زمانمده سؤاللرڭ، بنى مشكل بر موقعده بولونديرييور. بو دفعهكى ايكى سؤالڭ چندان جزئيدر. فقط ايكى نكتهِٔ قرآنيهيه مناسبتدار اولدقلرندن و كُرهِٔ أرضه دائر سؤالڭز، جغرافيا و قوزموغرافيانڭ يدى قات زمين و يدى طبقه سماواته تنقيدلرينه تماس ايتديگندن، بڭا أهمّيتلى گلدى. اونڭ ايچون سؤالڭ جزئيتنه باقميهرق علمى و كلّى بر صورتده، ايكى آيتِ كريمهيه دائر ايكى نكته إجمالًا بيان ايديلهجك. سن ده جزئى سؤالنه قارشى اوندن حصّه آليرسڭ.
برنجى نكته:"ايكى نقطه"در.
برنجى نقطه:
وَكَاَيِّنْ مِنْ دَابَّةٍ لَا تَحْمِلُ رِزْقَهَا اَللّٰهُ يَرْزُقُهَا وَاِيَّاكُمْ ٭ اِنَّ اللّٰهَ هُوَ الرَّزَّاقُ ذُو الْقُوَّةِ الْمَتِينُ
آيتلرينڭ سرّنجه: رزق طوغريدن طوغرىيه
— 167 —
قديرِ ذو الجلالڭ ألندهدر و خزينهِٔ رحمتندن چيقار. هر بر ذىحياتڭ رزقى، تعهّدِ ربّانيسى آلتنده اولديغندن، آجلقدن ئولمك، اولمامق لازم گلير. حالبوكه ظاهرًا آجلقدن و رزقسزلقدن ئولنلر چوق گورونويور. شو حقيقتڭ و شو سرّڭ حلّى شودر كه: تعهّدِ ربّانى حقيقتدر. رزقسزلق يوزندن ئولنلر يوقدر. چونكه او حكيمِ ذو الجلال، ذىحياتڭ بدننه گوندرديگى رزقڭ بر قسمنى إحتياط ايچون شحم و ايچ ياغى صورتنده إدّخار ايدر. حتّى بدنڭ هر حجيرهسنه گوندرديگى رزقڭ بر قسمنى، ينه او حجيرهنڭ بر كوشهسنده إدّخار ايدر. إستقبالده خارجدن رزق گلمديگى زمان، صرف ايديلمك اوزره بر إحتياط ذخيرهسى حكمنده بولونديرر.
ايشته بو إدّخار ايديلمش إحتياط رزق بيتمهدن أوّل ئولويورلر. ديمك او ئولمك، رزقسزلقدن دگلدر. بلكه سوءِ إختياردن تولّد ايدن بر عادت و او سوءِ إختياردن و عادتڭ تركندن نشئت ايدن بر مرضله ئولويورلر. أوت ذىحياتڭ بدننده شحم صورتنده إدّخار ايديلن رزقِ فطرى، حدِّ وَسَط اولارق قرق گون مكمّلًا دوام ايدر. حتّى بر مرضڭ ويا بر إستغراقِ روحانى نتيجهسنده ايكى قرقى گچر. حتّى بر آدم، شديد بر عناد يوزندن لوندره محبوسخانهسنده يتمش گون صحّت و سلامتله، هيچ بر شى ييمهدن حياتى دوام ايتديگنى، اون اوچ (شيمدى اوتوز طوقوز) سنه أوّل غزتهلر يازمشلر. مادام قرق گوندن يتمش سكسان گونه قدر رزقِ فطرى دوام ايدييور و مادام رزّاق إسمى، غايت گنيش بر صورتده روىِ زمينده جلوهسى گورونويور و مادام هيچ اُميد ايديلمديگى بر طرزده، ممهدن و اودوندن رزقلر آقييور، باش گوسترييور. أگر پرشرّ بشر، سوءِ إختياريله مداخله ايدوب قاريشمازسه، هر حالده رزقِ فطرى بيتمهدن أوّل، او ذىحياتڭ إمدادينه او إسم يتيشييور، آجلقله ئولومه يول ويرمييور. اويله ايسه: آجلقدن ئولنلر، أگر قرق گوندن أوّل ئولسهلر، قطعيًا رزقسزلقدن دگلدر. بلكه
تَرْكُ الْعَادَاتِ مِنَ الْمُهْلِكَاتِ
— 168 —
سرّيله، سوءِ إختياردن گلن بر عادت و تركِ عادتدن نشئت ايدن بر علّتدن، بر مرضدن ايلرى گلمشدر. اويله ايسه: آجلقدن ئولمك اولماز، دينيلهبيلير.
أوت بِالمشاهده گورونويور كه: رزق، إقتدار و إختيار ايله معكوسًا متناسبدر. مثلا: داها دنيايه گلمهدن أوّل بر ياورو، رحمِ مادرده إختيار و إقتداردن بتون بتون محروم اولديغى بر زمانده، آغزينى قيميلداتهجق قدر محتاج اولميهجق بر صورتده رزقى ويريلييور. صوڭره دنيايه گلديگى وقت، إقتدار و إختيار يوق، فقط بر درجه إستعدادى و بِالقوّه بر حسّى اولديغندن، يالڭز آغزينى ياپيشديرمق قدر بر حركته إحتياج ايله أڭ مكمّل و أڭ مُغَدّى و هضمى أڭ قولاى و أڭ لطيف بر صورتده و أڭ عجيب بر فطرتده، ممهلر موصلغندن آغزينه ويريلييور. صوڭره إقتدار و إختياره بر درجه علاقه پيدا ايتدكجه، او قولاى و گوزل رزق، بر درجه، چوجغه قارشى نازلانمغه باشلار. او ممهلر چشمهلرى كسيلير، باشقه يرلردن رزقى گوندريلير. فقط إقتدار و إختيارى، رزقى تعقيب ايتمگه مساعد اولماديغى ايچون، رزّاقِ كريم پدر و والدهسنڭ شفقت و مرحمتلرينى، إقتدار و إختيارينه يارديمجى گوندرييور. هر نه وقت إقتدار و إختيار تكمّل ايدر، او وقت رزقى اوڭا قوشماز و قوشديريلماز. رزق يرنده طورور. دير: "گل بنى آرا و بول و آل!" ديمك رزق، إقتدار و إختيار ايله معكوسًا متناسبدر. حتّى چوق رسالهلرده بيان ايتمشز كه: أڭ إختيارسز و إقتدارسز حيوانلر، داها ايى ياشايورلر، داها ايى بسلهنييورلر.
ايكنجى نقطه:
إمكانڭ أنواعى وار. إمكانِ عقلى، إمكانِ عُرفى، إمكانِ عادى گبى قسملرى واردر. بر حادثه، أگر إمكانِ عقلى دائرهسنده اولمازسه، ردّ ايديلير؛ إمكانِ عُرفى دائرهسنده اولمازسه دخى، معجزه اولور فقط قولايجه كرامت اولاماز. أگر عرفًا و قاعدةً نظيرى بولونمازسه، شهود درجهسنده بر برهانِ قطعى ايله آنجق قبول ايديلير.
— 169 —
ايشته بو سرّه بناءً قرق گون أكمك ييمهين سيّد أحمدِ بدوينڭ خارق العاده حاللرى، إمكانِ عُرفى دائرهسندهدر. هم كرامت اولور، هم خارق العاده بر عادتى ده اولابيلير. أوت سيّد أحمدِ بدوينڭ (قس) عجيب و إستغراقكارانه حاللرده بولونديغى، تواتر درجهسنده نقل ايديلييور. قرق گونده بر دفعه يمك يمهسى، واقع اولمشدر. فقط هر وقت اويله دگل. كرامت نوعندن بعض دفعه اولمشدر. بر إحتمال وار كه: حالتِ إستغراقيهسى، ييمگه إحتياج گورمديگى ايچون، اوڭا نسبةً عادت حكمنه گيرمشدر. سيّد أحمدِ بدوى (قس) نوعندن چوق أوليالردن بو طرز خارقهلر موثوقًا روايت ايديلمش. مادام برنجى نقطهده إثبات ايتديگمز گبى؛ مدّخر رزق، قرق گوندن فضله دوام ايدر و او مقدار ييمهمك، عادةً ممكندر و موثوقًا خارقه آدملردن او حال روايت ايديلمشدر. ألبته إنكار ايديلميهجكدر.
ايكنجى سؤالمناسبتيله ايكى مسئلهِٔ مهمّه بيان ايديلهجك. چونكه جغرافيا و قوزموغرافيا فنلرينڭ قيصهجق قانونلريله و طاراجق دستورلريله و كوچوجك ميزانلريله قرآنڭ سماواتنه چيقامدقلرندن و آياتڭ ييلديزلرندهكى يدى قات معنالرى كشف ايدهمدكلرندن آيتى تنقيد، بلكه إنكارينه ديوانهجهسنه چاليشمشلر.
برنجى مسئلهِٔ مهمّه:
سماوات گبى أرضڭ ده يدى طبقه اولماسنه دائردر. شو مسئله، يڭى زمانڭ فيلسوفلرينه حقيقتسز گورونويور. اونلرڭ أرضه و سماواته دائر اولان فنلرى قبول ايتمييور. بونى واسطه ايدهرك بعض حقائقِ قرآنيهيه إعتراض ايدييورلر. بوڭا دائر مختصرًا بر قاچ إشارت يازاجغز.
برنجيسى:أوّلا: آيتڭ معناسى آيريدر و او معنالرڭ أفرادى و ماصدقلرى آيريدر. ايشته او كلّى معنانڭ متعدّد أفرادندن بر فردى بولونمازسه، او معنا إنكار ايديلمز.
— 170 —
سماواتڭ يدى طبقهسنه و أرضڭ يدى قاتنه دائر معناىِ كلّيسنڭ چوق أفرادندن يدى ماصدق ظاهرًا گورونويور.
ثانيًا: آيتڭ صراحتنده "يدى قات أرض" ديمهمش.
اَللّٰهُ الَّذِى خَلَقَ سَبْعَ سَموَاتٍ وَمِنَ الْاَرْضِ مِثْلَهُنَّ
إلٰى آخر. آيتڭ ظاهرى دييور كه: "أرضى ده او سبعه سماوات گبى خلق ايتمش و مخلوقاتنه مسكن إتّخاذ ايتمش." يدى طبقه اولارق خلق ايتدم، ديمييور. مِثليت ايسه مخلوقيت و مخلوقاته مسكنيت جهتيله بر تشبيهدر.
ايكنجيسى:كُرهِٔ أرض هر نه قدر سماواته نسبةً چوق كوچكدر، فقط حدسز مصنوعاتِ إلٰهيهنڭ مشهرى، مظهرى، محشرى، مركزى حكمنده اولديغندن؛ قلب، جسده مقابل گلديگى گبى، كُرهِٔ أرض دخى، قوجه حدسز سماواته قارشى بر قلب و معنوى بر مركز حكمنده اولارق مقابل گلير. اونڭ ايچون زمينڭ كوچك مقياسده أسكيدن بَرى يدى
(٭): سبعه ايله برابر يدى كلمهسى يدى كرّه توافقى پك گوزل دوشمش.
إقليمى؛ هم آوروپا، آفريقا، اوقيانوسيا، ايكى آسيا، ايكى آمريقا ناملريله معروف يدى قطعهسى؛ هم دڭزله برابر شرق، غرب، شمال، جنوب، بو يوزدهكى و يڭى دنيا يوزندهكى معلوم يدى قطعهسى؛ هم مركزندن تا قشرِ ظاهرىيه قدر حكمةً، فنًّا ثابت اولان متّصل و متنوّع يدى طبقهسى، هم ذىحيات ايچون مدارِ حيات اولمش يتمش بسيط و جزئى عنصرلرى تضمّن ايدوب و "يدى قات" تعبير ايديلن مشهور يدى نوع كلّى عنصرى؛ هم درت عنصر دينيلن صو، هوا، نار، طوپراق (تراب) ايله برابر، "مواليدِ ثلاثه" دينيلن معادن، نباتات و حيواناتڭ يدى طبقهلرى و يدى قات عالملرى؛ هم جنّ و عفريت و سائر مختلف ذىشعور و ذىحيات مخلوقلرڭ عالملرى و مسكنلرى
— 171 —
اولديغى، چوق كثرتلى أهلِ كشف و أصحابِ شهودڭ شهادتيله ثابت يدى قات أرضڭ عالملرى؛ هم كُرهِٔ أرضمزه بڭزهين يدى كُرهِٔ اُخرا دخى بولونماسنه، ذىحياته مقرّ و مسكن اولماسنه إشارةً يدى طبقه يعنى يدى كُرهِٔ أرضيه بولونماسنه إشارةً كُرهِٔ أرض دخى، يدى طبقه آياتِ قرآنيهدن فهم ايديلمشدر.
ايشته يدى نوع ايله يدى طرزده، أرضڭ يدى طبقهسى موجود اولديغى تحقّق ايدييور. سكزنجيسى اولان آخركى معنا، باشقه نقطهِٔ نظرده أهمّيتليدر؛ او يديده داخل دگلدر.
اوچنجيسى:مادام حكيمِ مطلق إسراف ايتمييور، عبث شيلرى ياراتمييور. و مادام مخلوقاتڭ وجودلرى، ذىشعور ايچوندر و ذىشعورله كمالنى بولور و ذىشعورله شنلهنير و ذىشعورله عبثيتدن قورتولور. و مادام بِالمشاهده او حكيمِ مطلق، او قديرِ ذو الجلال، هوا عنصرينى، صو عالمنى، طوپراق طبقهسنى حدسز ذىحياتلرله شنلنديرييور. و مادام هوا و صو، حيواناتڭ جولاننه مانع اولماديغى گبى؛ طوپراق، طاش گبى كثيف مادّهلر، ألكتريق و رونتگن گبى مادّهلرڭ سيرينه مانع اولمايورلر. ألبته او حكيمِ ذو الكمال، او صانعِ بىزوال، كُرهِٔ أرضمزڭ مركزندن طوت، تا مسكنمز و مركزيمز اولان بو قشرِ ظاهرىيه قدر بربرينه متّصل يدى كلّى طبقهيى و گنيش ميدانلرينى و عالملرينى و مغارهلرينى بوش و خالى بيراقماز. ألبته اونلرى شنلنديرمش. او عالملرڭ شنلنمهسنه مناسب و موافق ذىشعور مخلوقلرى خلق ايدوب اوراده إسكان ايتمشدر. او ذىشعور مخلوقلر، مادام كه ملائكه أجناسندن و روحانى أنواعلرندن اولمق لازم گلير. ألبته أڭ كثيف و أڭ سرت طبقه، اونلره نسبةً، باليغه نسبةً دڭز و قوشه نسبةً هوا گبيدر. حتّى زمينڭ مركزندهكى مدهش آتش دخى، او ذىشعور مخلوقلره نسبتى، بزلره نسبةً گونشڭ حرارتى گبى اولمق إقتضا ايدر. او ذىشعور روحانيلر نوردن اولدقلرى ايچون، نار اونلره نور گبى اولور.
— 172 —
دردنجيسى:اون سكزنجى مكتوبده طبقاتِ أرضڭ عجائبنه دائر أهلِ كشفڭ طورِ عقل خارجنده بيان ايتدكلرى تصويراته دائر بر تمثيل ذكر ايديلمشدر. خلاصهسى شودر كه: كُرهِٔ أرض، عالمِ شهادتده بر چكردكدر؛ عالمِ مثاليه و برزخيهده بر بيوك آغاج گبى، سماواته اوموز اوموزه وورهجق بر عظمتدهدر. أهلِ كشفڭ كُرهِٔ أرضده عفريتلره مخصوص طبقهسنى بيڭ سنهلك بر مسافه گورمهلرى، عالمِ شهادته عائد كُرهِٔ أرضڭ چكردگنده دگل، بلكه عالمِ مثاليدهكى داللرينڭ و طبقهلرينڭ تظاهريدر. مادام كُرهِٔ أرضڭ ظاهرًا أهمّيتسز بر طبقهسنڭ بويله باشقه عالمده عظمتلى تظاهراتى وار؛ ألبته يدى قات سماواته مقابل يدى قات دينيلهبيلير و مذكور نقطهلرى إخطار ايچون ايجاز ايله إعجازكارانه بر طرزده آياتِ قرآنيه، سماواتڭ يدى طبقهسنه قارشى بو كوچوجك أرضى مقابل گوسترمكله إشارت ايدييور.
ايكنجى مسئلهِٔ مهمّهدر:
تُسَبِّحُ لَهُ السَّمٰوَاتُ السَّبْعُ وَالْاَرْضُ وَمَنْ فِيهِنَّ إلى آخر...
ثُمَّ اسْتَوٰى اِلَى السَّمَاءِ فَسَوّٰيهُنَّ سَبْعَ سَمٰوَاتٍ وَهُوَ بِكُلِّ شَيْءٍ عَلِيمٌ
شو آيتِ كريمه گبى متعدّد آيتلر، سماواتى يدى سما اولارق بيان ايدييور. إشارات الإعجاز تفسيرنده أسكى حربِ عمومينڭ برنجى سنهسنده جبههِٔ حربده إختصار مجبوريتيله غايت مجمل بيان ايتديگمز او مسئلهنڭ يالڭز بر خلاصهسنى يازمق مناسبدر. شويله كه:
أسكى حكمت، سماواتى طوقوز تصوّر ايدوب، لسانِ شرعيده، عرش و كرسى يدى سماوات ايله برابر قبول ايدوب عجيب بر صورتله سماواتى تصوير ايتمشديلر. او أسكى حكمتڭ داهى حكماسنڭ شعشعهلى إفادهلرى، نوعِ بشرى
— 173 —
چوق عصرلر مدّتنجه تحكّملرى آلتنده طوتمشلر. حتّى چوق أهلِ تفسير، آياتڭ ظاهرلرينى اونلرڭ مذهبنه گوره توفيق ايتمگه مجبور قالمشلر. او صورتله قرآنِ حكيمڭ إعجازينه بر درجه پرده چكيلمشدى. و حكمتِ جديده نامى ويريلن يڭى فلسفه ايسه، أسكى فلسفهنڭ مرور و عبوره و خرق و إلتيامه قابل اولميان سماوات حقّندهكى إفراطنه مقابل تفريط ايدوب، سماواتڭ وجودينى عادتا إنكار ايدييورلر. أوّلكيلر إفراط، صوڭرهكيلر تفريط ايدوب حقيقتى تماميله گوسترهمهمشلر. قرآنِ حكيمڭ حكمتِ قدسيهسى ايسه، او إفراط و تفريطى بيراقوب حدِّ وسطى إختيار ايدوب دير كه: صانعِ ذو الجلال، يدى قات سماواتى خلق ايتمشدر. حركت ايدن ييلديزلر ايسه، باليقلر گبى سما ايچنده گزرلر و تسبيح ايدرلر. حديثده اَلسَّمَاءُ مَوْجٌ مَكْفُوفٌ دينيلمش. يعنى: "سما، أمواجى قرارداده اولمش بر دڭزدر."
ايشته بو حقيقتِ قرآنيهيى يدى قاعده و يدى وجه معنا ايله غايت مختصر بر صورتده إثبات ايدهجگز.
برنجى قاعده:فنًّا و حكمةً ثابتدر كه: بو حدّى يوق فضاىِ عالم، نهايتسز بر بوشلق دگل، بلكه "أثير" ديدكلرى مادّه ايله طولودر.
ايكنجيسى:فنًّا و عقلًا، بلكه مشاهدةً ثابتدر كه: أجرامِ علويهنڭ جاذبه و دافعه گبى قانونلرينڭ رابطهسى و ضيا و حرارت و ألكتريق گبى مادّهلردهكى قوّتلرڭ ناشرى و ناقلى، او فضايى طولديران بر مادّه موجوددر.
اوچنجيسى:مادّهِٔ أثيريه، أثير قالمقله برابر، سائر مادّهلر گبى مختلف تشكّلاته و آيرى آيرى صورتلرده بولونديغى تجربةً ثابتدر. أوت ناصلكه بخار، صو، بوز گبى هوائى، مايع، جامد اوچ نوع أشيا، عين مادّهدن اولويور. اويله ده: مادّهِٔ أثيريهدن
— 174 —
دخى يدى نوع طبقات اولماسنه هيچ بر مانعِ عقلى اولماديغى گبى، هيچ بر إعتراضه مدار اولماز.
دردنجيسى:أجرامِ علويهيه دقّت ايديلسه گورونويور كه: او علوى عالملرڭ طبقاتنده مخالفت وار. مثلا: نَهْرُ السماء و كهكشان ناميله معروف، توركجه "صمان يولى" تعبير اولونان بلوط شكلندهكى دائرهِٔ عظيمهنڭ بولونديغى طبقه، ألبته ثوابت ييلديزلرڭ طبقهسنه بڭزهمييور. گويا طبقهِٔ ثوابت ييلديزلرى، ياز ميوهلرى گبى يتيشمش، ايرمشلر. و او كهكشاندهكى بلوط شكلنده گورولن حدسز ييلديزلر ايسه، يڭيدن يڭىيه چيقوب ايرمگه باشلايورلر. طبقهِٔ ثوابت دخى، صادق بر حدس ايله منظومهِٔ شمسيهنڭ طبقهسنه مخالفتى گورونويور. و هكذا يدى منظومات و يدى طبقه، بربرينه مخالف بولونماسى، حسّ و حدس ايله درك اولونور.
بشنجيسى:حدسًا و حسًّا و إستقراءً و تجربةً ثابت اولمشدر كه: بر مادّهده تنظيم و تشكيل دوشسه و او مادّهدن باشقه مصنوعات ياپيلسه، ألبته مختلف طبقه و شكللرده اولور. مثلا: ألماس معدننده تشكيلات باشلاديغى وقت، او مادّهدن هم رماد يعنى هم كول، هم كومور، هم ألماس نوعلرى تولّد ايدييور. هم مثلا: آتش، تشكّله باشلاديغى وقت؛ هم آلَوْ، هم دومان، هم قور طبقهلرينه آيريلييور. هم مثلا: مولّد الماء، مولّد الحموضه ايله مزج ايديلديگى وقت، او مزجدن هم صو، هم بوز، هم بخار گبى طبقهلر تشكّل ايدييور. ديمك آڭلاشيلييور كه بر مادّهِٔ واحدده تشكيلات دوشسه، طبقاته آيريلييور. اويله ايسه: مادّهِٔ أثيريهده قدرتِ فاطره تشكيلاته باشلاديغى ايچون، ألبته آيرى آيرى طبقه اولارق فَسَوّٰيهُنَّ سَبْعَ سَمٰوَاتٍ سرّيله يدى نوع سماواتى اوندن خلق ايتمشدر.
— 175 —
آلتنجيسى:شو مذكور أمارهلر، بِالضروره سماواتڭ هم وجودينه، هم تعدّدينه دلالت ايدرلر. مادام قطعيًا سماوات متعدّددر و مخبرِ صادق، قرآنِ معجز البيانڭ لسانيله يديدر دير؛ ألبته يديدر.
يدنجيسى:يدى، يتمش، يدى يوز گبى تعبيرات، اُسلوبِ عربىده كثرتى إفاده ايتديگى ايچون، او كلّى يدى طبقه چوق كثرتلى طبقهلرى حاوى اولابيلير.
الحاصل:قديرِ ذو الجلال، أثير مادّهسندن يدى قات سماواتى خلق ايدوب تسويه ايدهرك، غايت دقيق و عجيب بر نظام ايله تنظيم ايتمش و ييلديزلرى ايچنده زرع ايدوب أكمشدر. مادام قرآنِ معجز البيان، عموم إنس و جنّڭ عموم طبقهلرينه قارشى قونوشان بر خطبهِٔ أزليهدر. ألبته نوعِ بشرڭ هر بر طبقهسى، هر بر آياتِ قرآنيهدن حصّهسنى آلاجق و آياتِ قرآنيه، هر طبقهنڭ فهمنى تطمين ايدهجك صورتده آيرى آيرى و متعدّد معنالرى ضمنًا و إشارةً بولونهجقدر. أوت خطاباتِ قرآنيهنڭ وسعتى و معانى و إشاراتندهكى گنيشلگى و أڭ عامى بر عوامدن أڭ خاص بر خواصّه قدر درجاتِ فهملرينى مراعات و مماشات ايتمهسى گوسترر كه؛ هر بر آيتڭ هر بر طبقهيه بر وجهى وار، باقييور.
ايشته بو سرّه بناءً، "يدى سماوات" معناىِ كلّيسنده يدى طبقهِٔ بشريه، مختلف يدى قات معنايى فهم ايتمشلر. شويله كه: فَسَوّٰيهُنَّ سَبْعَ سَمٰوَاتٍ آيتنده، قيصه نظرلى و طار فكرلى بر طبقهِٔ إنسانيه، هواىِ نسيمينڭ طبقاتنى فهم ايدر. و قوزموغرافيا ايله سرسملشمش ديگر بر طبقهِٔ إنسانيه دخى، ألسنهِٔ أنامده سبعهِٔ سيّاره ايله مشهور ييلديزلرى و مدارلرينى فهم ايدر. داها بر قسم إنسانلر كرهمزه بڭزر ذوى الحياتڭ مقرّى اولمش سماوى يدى كُرهِٔ آخَرى فهم ايدر. ديگر بر طائفهِٔ بشريه، منظومهِٔ شمسيهنڭ يدى طبقهيه آيريلماسنى، هم منظومهِٔ شمسيهمزله
— 176 —
برابر يدى منظوماتِ شموسيهيى فهم ايدر. داها ديگر بر طائفهِٔ بشريه، مادّهِٔ أثيريهنڭ تشكّلاتى يدى طبقهيه آيريلماسنى فهم ايدر. داها گنيش فكرلى بر طبقهِٔ بشريه، ييلديزلرله يالديزلانوب، بتون گورونن گوكلرى بر سما صايوب، اونى بو دنيانڭ سماسيدر دييهرك، بوندن باشقه آلتى طبقهِٔ سماوات وار اولديغنى فهم ايدر. و نوعِ بشرڭ يدنجى طبقهسى و أڭ يوكسك طائفهسى ايسه؛ سماواتِ سبعهيى، عالمِ شهادته منحصر گورمييور. بلكه عوالمِ اُخرويه و غيبيه و دنيويه و مثاليهنڭ برر محيط ظرفى و إحاطهلى برر سقفى اولان يدى سماواتڭ وار اولديغنى فهم ايدر.
و هكذا بو آيتڭ كلّيتنده مذكور يدى قات طبقهنڭ يدى قات معنالرى گبى داها چوق جزئى معنالرى واردر. هركس فهمنه گوره حصّهسنى آلير و او مائدهِٔ سماويهدن هركس رزقنى بولور.
مادام او آيتڭ بويله پك چوق صادق ماصدقلرى وار. شيمديكى عقلسز فيلسوفلرڭ و سرسرى قوزموغرافيالرينڭ، إنكارِ سماوات بهانهسيله بويله آيته تعرّض ايتمهسى، هايلاز أحمق چوجقلرڭ سماواتدهكى ييلديزلره بر ييلديزى دوشورمك نيّتيله طاش آتماسنه بڭزر. چونكه آيتڭ معناىِ كلّيسندن بر تك ماصدق صادقسه، او كلّى معنا صادق و حق اولور. حتّى واقعده بولونميان، فقط عمومڭ لساننده متداول بولونان بر فردى، عمومڭ أفكارينى مراعات ايچون او كلّيده داخل اولابيلير. حالبوكه، حق و حقيقى چوق أفرادينى گوردك. و شيمدى بو إنصافسز و حقسز جغرافيايه و سرسم و سرمست و سرخوش قوزموغرافيايه باق! ناصل بو ايكى فن خطا ايدهرك، حق و حقيقت و صادق اولان كلّى معنادن گوزلرينى يوموب و چوق صادق اولان ماصدقلرى گورميهرك؛ خيالى بر عجيب فردى، معناىِ آيت توهّم ايدهرك آيته طاش آتديلر؛ كندى باشلرينى قيرديلر، ايمانلرينى اوچورديلر!...
— 177 —
الحاصل:قرائتِ سبعه، وجوهِ سبعه و معجزاتِ سبعه و حقائقِ سبعه و أركانِ سبعه اوزرينه نازل اولان قرآن سماسنڭ او يديشر طبقهلرينه، جنّ و شياطين حكمندهكى إعتقادسز مادّى فكرلر چيقامدقلرندن آياتڭ نجومنده نه وار، نه يوق بيلمهيوب يالان و ياڭليش خبر ويررلر. و اونلرڭ باشلرينه او آياتڭ نجومندن مذكور تحقيقات گبى شهابلر اينرلر و اونلرى ياقارلر. أوت جنّ فكرلى فيلسوفلرڭ فلسفهسيله او سماواتِ قرآنيهيه چيقيلماز. بلكه آياتڭ ييلديزلرينه، حكمتِ حقيقيهنڭ معراجيله و ايمان و إسلاميتڭ قنادلريله چيقيلهبيلير.
اَللّٰهُمَّ صَلِّ عَلٰى شَمْسِ سَمَاءِ الرِّسَالَةِ وَ قَمَرِ فَلَكِ النُّبُوَّةِ وَ عَلٰى اٰلِهِ وَ صَحْبِهِ نُجُومِ الْهُدٰى لِمَنِ اهْتَدٰى
سُبْحَانَكَ لَا عِلْمَ لَنَا اِلَّا مَا عَلَّمْتَنَا اِنَّكَ اَنْتَ الْعَلِيمُ الْحَكِيمُ
اَللّٰهُمَّ يَا رَبَّ السَّمٰوَاتِ وَ الْاَرْضِ زَيِّنْ قُلُوبَ كَاتِبِ هٰذِهِ الرِّسَالَةِ وَ رُفَقَائِهِ بِنُجُومِ حَقَائِقِ الْقُرْاٰنِ وَ الْاِيمَانِ اٰمِينَ
٭ ٭ ٭