— 5 —
بِسْمِ اللّٰهِ الرَّحْمٰنِ الرَّحِيمِ
وَ بِهِ نَسْتَعِينُ
تنبيه
إشارات الإعجاز تفسيرى؛ أسكى حربِ عمومينڭ برنجى سنهسنده، جبههِٔ حربده، مأخذسز و كتاب موجود اولماديغى حالده تأليف ايديلمشدر. حرب زماننڭ ضرورتندن باشقه، درت سببه بناءً غايت مختصر و ايجازلى بر طرزده يازلمش؛ فاتحه و نصفِ أوّل داها مجمل، داها مختصر قالمشدر.
أوّلا:او زمان، ايضاحه مساعده ايتمييوردى. أسكى سعيد، ايجازلى و قيصه تعبيراتله إفادهِٔ مرام ايدييوردى.
ثانيًا:غايت ذكى اولان كندى طلبهلرينڭ درجهِٔ فهملرينى دوشونويوردى، باشقهلرڭ آڭلامالرينى دوشونمييوردى.
ثالثًا:أسكى سعيد، أڭ دقيق و أڭ اينجه اولان نظمِ قرآندهكى ايجازلى اولان إعجازى بيان ايتديگى ايچون، قيصه و اينجه دوشمشدر. فقط شيمدى ايسه يڭى سعيد نظريله مطالعه ايتدم. الحقّ، أسكى سعيدڭ بتون خطيئاتيله برابر، شو تفسيردهكى تدقيقاتِ عاليهسى، اونڭ بر شاه أثريدر. يازلديغى وقت دائما شهيد اولمغه حاضرلانديغى ايچون، خالص بر نيّت ايله و بلاغتڭ قانونلرينه و علومِ عربيهنڭ دستورلرينه تطبيق ايدهرك يازديغى ايچون هيچ برينى جرح ايدهمدم. بلكه جنابِ حق، بو أثرى اوڭا كفّارةِ ذنوب ياپهجق و بو تفسيرى ده تام آڭلايهجق آدملرى يتيشديرهجك إن شاء اللّٰه.
— 6 —
أگر برنجى حربِ عمومى گبى مانعلر اولماسه ايدى، تفسيرڭ شو برنجى جلدى، إعجاز وجوهندن اولان إعجازِ نظمىيى بيان ايتديگى گبى، ديگر جزءلر و مكتوبلر ده متفرّق حقائقِ تفسيريهيى ايچنه آلسه ايدى، قرآنِ معجز البيانه گوزل بر تفسيرِ جامع اولوردى. بلكه إن شاء اللّٰه، شو جزءِ تفسير و آلتمش آلتى عدد، بلكه يوز اوتوز عدد "سوزلر" و "مكتوبات" رسالهلريله برابر مأخذ اولورسه، ايلريده بختيار بر هيئت اويله بر تفسيرِ قرآنى يازسين، إن شاء اللّٰه...
سعيد النورسى
حاشيه:
بو خارقه تفسيرده، منافقلر حقّنده اولان اون ايكى آيت ايله معنّد كافرلر ايچون اولان ايكى آيتڭ ايضاحات و تفصيلاتنڭ ايچنده چوق مناسباتِ بلاغتى چوقلر آڭلاميهجق و إستفاده ايتميهجك أهمّيتسز نكتهلرينڭ ذكر ايديلمهسنڭ سرّى و ديگر آيتلردهكى تحقيقه و ايضاحه مخالف اولارق ماهيتِ كفريهنڭ تفصيلاتنه و أهلِ نفاقڭ تمسّك ايتدكلرى شبههلرينه پك آز تماس ايديلمهسنڭ حكمتى و يالڭز ألفاظِ قرآنيهنڭ اينجه إشارات و دلالتلرينڭ أهمّيتله بيان ايديلمهسنڭ سببى اوچ نكتهدر:
برنجى نكته:بدايتِ ظهورِ إسلاميتده معنّد و كتابسز كافرلرڭ و نفاقه گيرن أسكى دينلرڭ منافقلرى گبى، عينًا بو زمانِ آخرده بر نظيرهسى چيقهجغنى، درسِ قرآنيدن گلن بر سنوحات ايله أسكى سعيد حسّ ايتمش. منافقلر حقّندهكى آيتلرى ايضاح ايله أڭ اينجه نكتهلرى بيان ايتمش، فقط مطالعهجيلرڭ ذهننى بولانديرمامق ايچون ماهيتِ مسلكلرينى و إستناد نقطهلرينى مجمل بيراقمش، ايضاح ايتمهمش. ذاتًا رسالهِٔ نورڭ مسلگى اودر كه؛ ذهنلرده بر ايز بيراقمهمق ايچون، سائر علمايه مخالف اولارق، معارضلرڭ شبههلرينى ذكر ايتمهدن اويله بر جواب ويرر كه، داها وهم و وسوسهيه ير قالماز. أسكى سعيد بو تفسيرده، رسالهِٔ نور گبى، ذهنلرى بولانديرمامق ايچون يالڭز بلاغت نقطهسنده لفظڭ دلالتنه و إشاراتنه أهمّيت ويرمش.
— 7 —
ايكنجى نكته:مادام قرآنِ حكيمڭ هر حرفنڭ اوقونماسيله اويله بر قيمتى اولور كه؛ بر حرف اون، يوز، بيڭ و بيڭلر ثوابى و باقى ميوهِٔ اُخروىيى ويرهجك ماهيتدهدر؛ ألبته أسكى سعيدڭ بو تفسيرنده بر صاچ گبى، بر ذرّه گبى، قرآنڭ كلماتنه تماس ايدن نكتهلرى ايضاح ايتمهسى إسراف دگل، أهمّيتسز دگل. بلكه گوز قپاقلرينڭ كيرپيكلرى و بلكه گوز ببگينڭ ذرّهلرى گبى قيمتلى اولديغنى حسّ ايتمش كه، او دهشتلى حرب ايچنده بو اينجهجك صاچ گبى مناسبتلرى يازمقدن و دوشونمكدن، آوجى خطّنده دشمن گلّهلرى اونى شاشيرتمامش، اوندن واز گچيرمهمش.
(حاشيه): عجبا بويله بر آدم، هيچ ممكن ميدر كه؛ دينى سياسته، دنيايه آلَت ايتسين. بو إتهامى ياپانلرڭ، نه درجه عدالتدن خارج بر ظلم ايتدكلرى آڭلاشيلير.
نور طلبهلرندن
زبير، بايرام
اوچنجى نكته:توركجهيه ترجمهسى، عربجهدهكى جزالت، بلاغت و خارقه قيمتنى محافظه ايدهمهمش. بعضًا ده مختصر گيتمش. اونڭ ايچون منافقلر حقّندهكى اوزون تفصيلاتڭ بر قسمنى نشر ايتمهمك نيّت ايتدم. فقط قرآنه عائد اولماسى جهتيله قرآنه عائد بر ذرّهنڭ ده قيمتى بيوكدر. بلكه بعضلره ده فائدهسى واردر. إن شاء اللّٰه عربى تفسير بو ترجمهنڭ آخرنده بر مانع اولمازسه نشر ايديلهجك، ترجمهدهكى نقصانلرينى إزاله ايدهجك. فقط عربى تفسيرده توافقڭ أنواعندن چوق خارقهلر واردر، بشر إختيارى قاريشمامشدر. اونڭ ايچون او مطبوعڭ عين طرزنده (إمكانى وارسه) ممكن اولديغى قدر چاليشمق لازمدر كه، علامتِ مقبوليت اولان او خارقهلر غائب اولماسين.
سعيد النورسى
٭ ٭ ٭
— 8 —
بِاسْمِهِ سُبْحَانَهُ
قرق سنه أوّل حربِ عموميده، جبههده آوجى خطّنده بعضًا آت اوستنده تأليف ايديلن بو إشارات الإعجاز تفسيرينڭ بر قسمنى استاديمزدن درس آلدق. علمِ بلاغتى و قواعدِ عربيهيى بيلمديگمز حالده، آلديغمز درس ايله بوندهكى بر سرِّ عظيمى فهم ايتدك كه؛ بو إشارات الإعجاز تفسيرى، حقيقةً خارقهدر. بو تفسير، قرآنڭ وجوهِ إعجازندن يالڭز نظمندهكى إعجازى خارقه بر طرزده گوسترمسى مناسبتيله درت نقطهيى بيان ايدييورز:
برنجيسى:مادام قرآن كلام اللّٰهدر؛ عموم عصرلر اوزرنده و آرقهسنده اوطوران مختلف طبقه طبقه اولارق ديزلمش بتون نوعِ بشره خطاب ايدييور، درس ويرييور. هم بو كائنات خالقِ ذو الجلالنڭ كلامى اولارق ربوبيتڭ أڭ يوكسك مرتبهسندن چيقوب، بو بيڭلر مختلف طبقه مخاطبلرله قونوشويور، عمومنڭ بتون سؤاللرينه و إحتياجلرينه جواب ويرييور؛ ألبته معنالرى، كلّى و عموميدر. بشر كلامى گبى مخصوص بر زمانه، معيّن بر طائفهيه و جزئى بر معنايه إنحصار ايتمييور. بتون جنّ و إنسڭ بيڭلر مختلف طبقهده اولان أفكار و عقول و قلوب و أرواحنڭ هر بريسنه لايق غدالرى ويرييور، طاغيتييور.
ايكنجيسى:كلامِ أزليدن گلن و بتون عصرلرى و بتون طوائفِ نوعِ بشرى مخاطب إتّخاذ ايدن قرآنِ حكيمڭ غايت كلّى معنالرينڭ، جوهرلرينڭ صدفى حكمنده اولان لفظِ قرآنى، ألبته كلّيدر. يالڭز قرائتنده هر بر حرفنڭ اون، يوز، بيڭ و بيڭلر و أيّامِ مباركهده اوتوز بيڭه قدر ثوابِ اُخروى و ميوهِٔ جنّت ويرن حروفِ قرآنيهنڭ هر برنده موجوديتى قطعى اولان إعجازڭ بر قسمنى بو تفسيرده گوردك.
اوچنجيسى:بر شيئڭ حسن و جمالى، او شيئڭ مجموعنده گورونور. جزءلره آيريلديغى وقت، مجموعنده گورونن حسن و جمال، پارچهلرنده گورونمز. او شيئڭ
— 9 —
عمومنده تظاهر ايدن نقش و گوزللك، هر بر قسمنده آرانماز. گورونمديگى وقت، گورونمهمسى اونڭ سببِ قصورى توهّم ايديلمز. بويله اولماسنه رغمًا، قرآنِ حكيمڭ سوره و آيتلرنده گورونن معجزهِٔ نظم، هيئات و كيفيات إعتباريله تحليل ايديلديگى وقت، باشقه بر طرزده ينه كندينى أهلِ تدقيقه گوسترييور. ايشته بو إشارات الإعجاز عربى تفسيرى، إعجازِ قرآنڭ يدى منبعندن بر منبعى اولان نظمندهكى جزالتى، أڭ اينجه أسرارينه قدر بيان و إظهار ايدييور. قرآنِ حكيمڭ اون، يوز، بيڭ و بيڭلر و أيّامِ مباركهده اوتوز بيڭه قدر ثمرهِٔ اُخروى ويرن حروفاتنڭ هر برينه عائد، إشارات الإعجازڭ أعظمى إهتمام ايله اونلردهكى إعجازى گوسترمگه چاليشماسى، ألبته إسراف دگل عينِ حقيقتدر.
دردنجيسى:قرآنِ حكيمڭ كلامِ أزليدن گلمسى و بتون عصرلردهكى بتون طبقاتِ بشره خطاب ايتمهسى حسبيله، معناسنده بر جامعيت و كلّيتِ خارقه واردر. إنساندهكى عقل و لسان گبى، بر آنده يالڭز بر مسئلهيى دوشونمك و يالڭز بر لفظى سويلهمك گبى جزئى دگل، گوز مِثللو محيط بر نظره صاحب اولمق گبى، كلامِ أزلى دخى بتون زمانى و بتون طائفهِٔ إنسانيهيى نظره آلان بر كلّيتده بر كلامِ إلٰهيدر. ألبته اونڭ معناسى، بشر كلامى گبى جزئى بر معنايه و خصوصى بر مقصده منحصر دگلدر. بو سببدن، بتون تفسيرلرده گورونن و صراحت، إشارت، رمز، ايما، تلويح، تلميح گبى طبقهلرله مفسّرينڭ بيان ايتدكلرى معنالر، قواعدِ عربيهيه و اصولِ نحوه و اصولِ دينه مخالف اولمامق شرطيله، او معنالر، او كلامدن بِالذّات مراددر، مقصوددر.
طاهرى، زبير، صونغور، ضيا، جيلان، بايرام
٭ ٭ ٭